တရုတ်ကျောင်းသားအများစုက အသံထွက်ခက်တဲ့ သူတို့နာမည်ကိုခေါ်ရလွယ်အောင်  အင်္ဂလိပ်နာမည် ပေးထားလေ့ ရှိပါတယ်။ ကိုယ်တို့အဆောင်က တိုနီလည်း ထိုနည်းလည်းကောင်းပေါ့။ တိုနီက တရုတ်လူမျိုးပီပီ ဒယ်အိုးတစ်လုံး၊ ယောက်မတစ်ချောင်းနဲ့ မီးဖိုခန်းမှာ အားပါးတရ ကြော်လှော် ချက်ပြုတ်လေ့ရှိပါတယ်။  သူက ပီဇာဟတ်မှာ အချိန်ပိုင်းလုပ်သူဖြစ်လို့ တခါတရံ အလုပ်အပြန်မှာ သူကိုယ်တိုင်ဖုတ်ထားတဲ့ ပီဇာယူလာပြီး ကိုယ်တို့ကို ကျွေးတတ်ပါတယ်။ တရုတ်ပြည် အရှေ့မြောက်ပိုင်း ဒါလီယန်မြို့ကလာတဲ့ တိုနီမှာ မိန်းကလေးသူငယ်ချင်း တော်တော် များပါတယ်။ သူနဲ့အဆင်ပြေပေမယ့် သူ့ဆီလာလည်တဲ့ တရုတ်မလေးတွေထဲက တစ်ယောက်နဲ့ ကိုယ်အစာမကြေ ဖြစ်ခဲ့ပါတယ်။ ဘယ့်နှယ် .. မိန်းကလေးဖြစ်ပြီး သူများနေတဲ့ အဆောင်လည်း လာလည်သေး၊ မမြင်အပ်တဲ့ သုံးပြီးသား လစဉ်သုံးပစ္စည်းကို ရေချိုးခန်းထဲက ကမုတ်ပေါ်မှာ တင်လိုတင်နဲ့။ အမှိုက်ပုံးလည်းရှိရဲ့သားနဲ့၊ အံ့သြဒေါသ ဖြစ်လိုက်ရတာ။ ကိုယ်လည်း စကားနဲ့မပြောချင်တော့ ရေချိုးခန်းနံရံမှာ စာရေးပြီး ကပ်လိုက်တယ်။ ပြည်မကြီးက တရုတ်မတွေ စည်းကမ်းမရှိဘူးရယ်လို့ တစ်ခါတည်း မှတ်ချက်ချပြီးသား ဖြစ်သွားပါတယ်။ ကိုယ့်တစ်ယောက်ထဲအမြင်လို့ မထင်လိုက်ပါနဲ့။ တစ်ခြားနိုင်ငံရောက် အဆောင်နေ ကိုယ့်သူငယ်ချင်းတွေလည်း ကိုယ်နဲ့မှတ်ချက်အတူတူပါ။ ကြော်လှော်ချက်ပြုတ်ပြီးရင် မီးဖိုခန်းကို သန့်ရှင်းရေးမလုပ်တာက အစ၊ ရေချိုးခန်းအိမ်သာ အသုံးအစွဲအဆုံး  complain တက်ချင်စရာတွေချည်းပါပဲ။

ဂရိနိုင်ငံမြောက်ပိုင်း ကိုဇားနီးမြို့ကနေ အင်္ဂလန်နိုင်ငံမှာ အီတလီစာလာသင်တဲ့ ဂျော်ဂျီ ခေါ် ဂျော့်ခ်ျက (သူ့ မိသားစုနာမည်အပါအ၀င် နာမည်ရင်းကရှည်ပြီး ဖတ်ရခက်လို့ ဂျော်ခ့်ျလို့ပဲ အတိုကောက်ခေါ်ပါတယ်) ဂရိစာက အခက်ဆုံးလို့ ဆိုပါတယ်။ နေမကောင်းရင် ဆေးမသောက်ဘဲ သဘာဝအတိုင်းပဲနေတတ်သူ၊ Godfather နဲ့ ဂျက်လီပါတဲ့ အက်ရှင်ကားတွေ သိပ်ကြိုက်ပြီး ထပ်ပြန်တလဲလဲကြည့်တတ်သူ မျက်လုံးညိုညို ဆံပင်ညိုကောက်ကောက်နဲ့  ဂျောခ့်ျက အင်္ဂလိပ်စာကို အသံလေးလေးဝဲ၀ဲနဲ့ ပြောတတ်သူပါ။  ဂရိစာမှာ အေကို အာလို့ အသံထွက်တော့  သူတစ်ခုခု ကျေနပ်အားရနှစ်သက်ပြီဆို amazing ကို အာမေးဇင်း အာမေးဇင်းလို့ အသံကျယ်ကြီးနဲ့ အော်လေ့ရှိပါတယ်။ ဒါကြောင့် သူတို့အခေါ်မှာ အေသင်မဟုတ်ဘဲ အာသင်ဖြစ်ကြောင်း ကိုယ်မှတ်သားလိုက်ရပါတယ်။ သူ့အဖို့ အင်္ဂလိပ်စာ လေ့လာသင်ယူနေဆဲဖြစ်လို့ တစ်ချို့စကားလုံးတွေ သိပ်မကြွယ်ဝသေးတော့ it looks delicious လို့ ပြောရမယ့်အစား it's beautiful လို့ ပြောတတ်သူပါ။ အင်္ဂလိပ်စာက လွယ်မယောင်နဲ့ ခက်ကြောင်းလည်း ပြောတတ်ပါသေးတယ်။ သူ့အစ်ကိုကြီးက အီတလီနိုင်ငံ မီလန်မြို့မှာ အလုပ်လုပ်ပါတယ်။ သူ့ကို အင်္ဂလန်မှာ ကျောင်းလိုက်အပ်၊ အိမ်ရှာပေးပြီး အစစအရာရာ ပံ့ပိုးထောက်ပံသူပါ။

ဂျော့ခ်ျလည်း အီတလီဘာသာနဲ့ ကျောင်းပြီးတဲ့အခါ  အီတလီမှာပဲ အလုပ်လုပ်မယ်လို့ ရည်ရွယ်ထားပါတယ်တဲ့။ ဂျော်ခ့်ျရဲ့မိဘများက ဂရိနိုင်ငံမှာ အသီးအရွက်နဲ့ပန်းတွေ ရောင်းချသူဆိုပေမယ့် အလယ်အလတ်လောက်ရှိမယ်လို့ ကိုယ်မှန်းလို့ရပါတယ်။ သူကလည်း ချွေတာတတ်သူပါ။ ဒါတောင်သူတို့က အီးယူနိုင်ငံသားတွေမို့ ကိုယ်တို့အာရှတိုက်က ကျောင်းသားတွေထက် ကျောင်းလခအများကြီး ပိုသက်သာပါတယ်။ ချက်စားဖို့ အိုးပဲလိုလို၊ ခရီးထွက်ဖို့ အနွေးထည်ပဲလိုလို ဘာမဆို ဂရိအိမ်ကိုပဲ လှမ်းမှာတတ်သူပါ။ အရှေ့ဆုံး အခန်းမှာနေတဲ့ကိုယ်က သူ့ပစ္စည်းတွေ လာသမျှ စာပို့သမားဆီက ဒိုင်ခံယူပေးရသူပါ။ Pasta နဲ့ Spaghetti တစ်လှည့်စီ ချက်စားပြီး ပထ၀ီဝင်ဘာသာရပ်မှာ ကျွမ်းကျင်သူ ဂျော်ဂျီက မြန်မာနိုင်ငံကို မသိရကောင်းလားဆိုပြီး သူ့ကိုယ်ကိုယ်သူ မကျေမနပ်ဖြစ်လိုက်သေးတာ။ ကျောင်းပိတ်ရက်မှာ ဂရိကို ခါတိုင်းလိုလေယာဉ်နဲ့မပြန်ဘဲ အီတလီကတစ်ဆင့် မြေထဲပင်လယ်တစ်လျှောက် သင်္ဘောစီးပြီး  ပင်လယ်ပြာပြာထဲက သူတို့နိုင်ငံရဲ့ လှပတဲ့ ကျွန်းတွေကို ရှုစားရင်းပြန်မယ်လို့ ကိုယ့်တို့ကို ပြောခဲ့ပါတယ်။ နောက်နှစ်ဥရောပဖလားမှာ ဂရိကဗိုလ်စွဲသွားတော့ ကိုယ်သူ့ကို သတိရမိပါတယ်။ သူသိပ်ပျော်နေမှာပဲလို့။

စနေတနင်္ဂနွေရောက်ပြီဆိုရင် အက်ဒ်လို့ အတိုကောက်ခေါ်တတ်တဲ့ အက်ဒ်ဝုဒ်ရဲ့  အင်္ဂလိပ်မ၀၀လေး ရောက်လာပါပြီ။ သူမကလည်း အက်ဒ်နဲ့အတူ အင်္ဂလန်တောင်ပိုင်းက ကိုယ်သိပ်ကြိုက်တဲ့  ရွှေဝါရောင် daffodils ပန်းတွေ လှိုင်လှိုင်ပွင့်ရာ ၀ိုက်ကျွန်းငယ် (Isle of Wight) ကပါ။ ခက်တာက အက်ဒ်ကောင်မလေးက မီးဖိုထဲဝင်ရင်  တွေ့ရာအိုးခွက်ပန်းကန် ဆွဲပြီးယူသုံး၊ ချက်ပြုတ်ပြီးရင်လည်း  ဘယ်တော့မှ ချက်ခြင်းမဆေးပါဘူး။ ရေချိုးဇလုံထဲမှာသာ အမွှေးအကြိုင်တွေ ဖယောင်းတိုင်မီးတွေ အကျအနထွန်းပြီး နာရီနဲ့ကြာအောင် ဇိမ်ယူချိုးတတ်တာ၊ တစ်ခြားသန့်ရှင်းရေးတော့ ဘာမှမလုပ်သလောက်ပါပဲ။ တစ်ရက်တော့ ကိုယ့်ပစ္စည်းတွေယူသုံးပြီး နှစ်ယောက်စလုံး သူတို့ကျွန်းကို ပြန်သွားပါတယ်။ တကယ်တော့ မီးဖိုချောင်ထဲက cabinet တွေမှာ ကိုယ့်အကန့်နဲ့ကိုယ် ပစ္စည်းတွေအားလုံး သီးခြားစီထားကြတာပါ။ ဒါပေမယ့် အားနေတဲ့အိုးကိုပဲ အလွယ်တကူ ယူသုံးကြတော့ အမြဲပုံမှန်ဆေးကြောပြီး သုံးဖို့အသင့်ဖြစ်နေတဲ့ ကိုယ့်ဒယ်အိုး၊ ပန်းကန်တွေ ပါပါသွားတာ။ သုံးပြီးဘေစင်မှာ  ပြန်မဆေးခဲ့ဘဲ ဒီအတိုင်းထားသွားတာ ကိုယ်တော်တော် စိတ်ဆိုး ဒေါသဖြစ်မိပါတယ်။ တစ်ရက်နဲ့ပေါ်မလာ၊ နှစ်ရက်နဲ့ပေါ်မလာ၊ ကိုယ်လည်း လုံးဝမဆေးဘဲ သူတို့ပြန်မလာမချင်း ဒီတိုင်းထားလိုက်တယ်။ လေးရက်မြောက်နေ့ကျမှ ပေါ်လာတယ်။ ကိုယ်စိတ်ဆိုးနေကြောင်း တိုနီပြောလိုက်လို့ ကိုယ့်ကိုတောင် သူက ပြန်စိတ်ဆိုးချင်သေးတယ်။ နောက်မှ ကိုယ့်ကိုလာတောင်းပန်ပြီး ပြန်ဆေးပေးပါတယ်။ ကိုယ်လည်း ပြောလိုက်တယ်။ သုံးတာသုံးပါ၊ ဒါပေမယ့်ပြီးရင်တော့ အဲလိုပစ်စလတ်ခတ် မထားခဲ့ပါနဲ့လို့။  အင်္ဂလိပ်လူမျိုးတွေဟာ သိပ်ကိုစည်းကမ်းရှိပြီး ယဉ်ကျေးတဲ့လူမျိုးတွေလို့ ငါသိထားတာနဲ့ တစ်ခြားစီပဲလို့ စိတ်ဆိုးဆိုးနဲ့ ပြောလိုက်တယ်။ ဒီတော့ ကိုရွှေအင်္ဂလိပ်က ဘာပြောတယ်ထင်လဲ။ သူက ကျွန်းသားမို့ မြို့ကလူတွေလောက် မယဉ်ကျေးပါဘူးတဲ့။ ကိုယ်လည်း သြော်... လို့ တစ်ခွန်းပဲ ပြောဖြစ်လိုက်တယ်။ နောက်ပိုင်း ကိုယ့်ပစ္စည်းတွေ ဘယ်တော့မှ ယူမသုံးတော့ပါဘူး။

ကိုယ်နဲ့တစ်ဆောင်တည်း အတူမနေရပေမယ့် သူနဲ့တစ်ဆောင်တည်းအတူနေတဲ့ ဂျာမန်ကျောင်းသား တစ်ယောက် ကိုလည်း ကိုယ်သတိထားမိပါတယ်။ ကိုယ်သွားလည်တဲ့အခါ သူကို့ကြည့်လိုက်ရင် အမြဲလို အနွေးထည် ထူထူဝတ်၊ မာဖလာစည်းထားတတ်သူပါ။ သူ့ကိုကိုယ်မေးကြည့်တော့ အင်္ဂလန်က ရာသီဥတုက သိပ်အေးတယ်။ နေလည်းမရှိဘူး။ ဂျာမနီမှာ အေးပေမယ့် နေရောင်ပိုရတယ်။ "no sun in England, more sun in Germany" လို့ ပြောလိုက်ရင် ကိုယ်က သဘောကျပြီး ပြုံးရပါတယ်။ ဂျာမန်ကျောင်းသားတွေဟာ ကိုယ်ထင်ထားတာထက်ကို အများကြီး ဖော်ရွေသဘော ကောင်းပါတယ်။

တစ်နှစ်တာအချိန်ကာလအတွင်းမှာ ဆုံတွေ့ခင်မင်ရသူတွေဖြစ်ပေမယ့် သူတို့နဲ့ပတ်သက်သမျှ အဆိုးအကောင်းတွေက ကိုယ့်မှတ်ဉာဏ်ထဲမှာ အမှတ်တရနဲ့ ရှိနေတုန်းပါပဲ။ 'Gags for Laugh' ကို ကြည့်ရတဲ့အခါ ကယ်ရိုလင်းကို သတိရမိသလို 'My Big Fat Greek Wedding' ကြည့်မိတဲ့အခါ ဂျော်ခ့်ျကို သတိရမိ ပြန်ပါတယ်။ ကမ္ဘာငယ်လေးထဲကထွက်ပြီး ပညာသင်ယူခွင့်ရရုံထက် ကိုယ်မသိသေးတဲ့   ဓလေ့စရိုက်မျိုးစုံနဲ့ လူမျိုးအဖုံဖုံ တွေ့ဆုံခွင့်ရခဲ့လို့ ကိုယ်ကျေနပ်ပါတယ်။ အခုဆိုရင် အားလုံးဟာ မတူညီတဲ့ တိုင်းပြည်အသီးသီးမှာ ကိုယ်ပိုင်ဘ၀တွေ လျှောက်လှမ်းဆောက်တည်လို့ တိုက်ဆိုင်မှုရှိတဲ့အခါ  အဆောင်နေ ကျောင်းသားဘ၀လေးတွေကို လှမ်းအမှတ်ရနေကြလိမ့်မယ်လို့ ကိုယ်ယုံကြည် ပါတယ်။

ချစ်ခင်လေးစားလျက်
ဇွန်မိုးစက်

ယူကေမှာကျောင်းတက်တုန်းက အဆောင်မှာ ဆုံတွေ့ခဲ့ရတဲ့ ရေခြားမြေခြားက အဆောင်သူနဲ့ အဆောင်သားတွေ အကြောင်း အမှတ်တရပါ။

ကိုယ်ပထမဆုံးနေတဲ့ ကျောင်းကစီစဉ်ပေးတဲ့အဆောင်က သုံးထပ်ဆောင်ရဲ့ အပေါ်ဆုံးထပ်ဘယ်ခြမ်းမှာ။ တစ်ခြမ်းမှာ ခုနစ်ခန်းရှိပါတယ်။ ရောက်ရောက်ချင်း ကိုယ့်ကို ပျူပျူငှာငှာ ခရီးဦးကြိုနှုတ်ဆက်လာသူက ကနေဒါနိုင်ငံသူလေး ကယ်ရိုလင်းပါ။ အစစအရာရာ အသစ်အဆန်းဖြစ်နေတဲ့ ကိုယ့်ကို တစ်ခြားအဆောင်သူတွေနဲ့ပါ မိတ်ဆက်ပေးပြီး အနေမခက်အောင်၊ စိတ်အားမငယ်အောင် ကူညီပေးခဲ့သူမို့ သူ့ကို သတိတရ ရှိလှပါတယ်။ ကိုယ်မလုပ်တတ်မှာစိုးလို့ ထမင်းပါတဲ့ ရယ်ဒီမိတ်ဗူးပေါ်က အလူမီနီယံဖွိုင်ကို ခက်ရင်းနဲ့ဖောက်ပြီး အာဗန်ထဲကိုထည့်ပေးရုံသာမက ကိုယ်အသင့်စားဖို့ ပန်းကန်နဲ့ဇွန်းခက်ရင်းအစ  ထမင်းစားပွဲပေါ်မှာ ချထားပေးတာ။ မနက်နိုးရင် နွားနို့တစ်ခွက်နဲ့ ယိုသုတ်ထားတဲ့ပေါင်မုန့်ပေါ်မှာ ငှက်ပျောသီးကို အ၀ိုင်းလိုက်လေးတွေလှီးပြီး တင်စားတတ်သူ ကာရိုလင်းက ပြင်သစ်မိဘများက ပေါက်ဖွားလာသူပါ။  ဒါကြောင့်ပဲ သူပြောဆိုတတ်မြောက်ခဲ့တဲ့ ပထမဆုံးဘာသာစကားဟာ ပြင်သစ်ဘာသာ ဖြစ်ခဲ့တယ်လို့ ပြောပြပါတယ်။ ကိုယ်က အလိုက်မသိသူပီပီ ပြင်သစ်နိုင်ငံက ပြင်သစ်လူမျိုးတွေဟာ မယဉ်ကျေးဘဲ ရိုင်းပျတတ်တာ ကြားဖူးကြောင်း ကိုယ်ပြောတော့ သူက လုံးဝမငြင်းဘဲ လက်ခံပါတယ်။ ပြီးတော့ ကိုယ့်ကိုပြောပြလိုက်ပါသေးတယ်။ ဥရောပလူမျိုးတွေထဲမှာ အိုင်းရစ်လူမျိုးတွေက အဖော်ရွေဆုံးပါတဲ့။ သူပြောတာ မှန်ကြောင်း ကိုယ်နောက်ပိုင်းမှာ သိခဲ့ပါတယ်။ အဲဒီ့အချိန်က ကမ္ဘာ့ဖလားပွဲ ကျင်းပနေချိန်ဖြစ်တော့ သူက ပြင်သစ်ဘက်က အားပေးသူပီပီ အုပ်စုပတ်လည် ပွဲဦးထွက်မှာပဲ  ချန်ပီယံပြင်သစ် မလှမပ ရှုံးနိမ့်သွားတော့ သူ့ခမျာ အားမလို အားမရတွေ ဖြစ်လို့။ ဒေးဗစ်ဘက်ခမ်ကို သဘောကျပြီး  ကိုယ်နဲ့တွေ့ချိန်မှာ အသက်၂၂နှစ်ရှိတဲ့ မွန်ထရီရယ်လ်မြို့သူလေးဟာ ရည်းစားတစ်ခါမှ မထားဘူးသူဆိုလို့ ကိုယ့်မှာအံ့သြရပါသေးတယ်။ သူသဘောကျဖူးတဲ့ ကောင်လေးတစ်ယောက်ရှိပေမယ့် သြစတြေးလျနိုင်ငံကဖြစ်နေလို့ သိပ်ဝေးလွန်းလို့ မစဉ်းစားတော့ဘူးလို့ ကိုယ့်ကို ပြောပြပါတယ်။ အခြား တစ်ဆောင်တည်းနေသူတွေက အမေရိကန်နိုင်ငံသူတွေပါ။ သူတို့တွေနဲ့ ကိုယ်သိပ်မရင်းနှီးခဲ့ ပါဘူး။ ဒါပေမယ့် ကိုယ်မှတ်ချက်ချမိလိုက်တာတစ်ခုက ကနေဒီယန်နဲ့ အမေရိကန်တွေဟာ အခြားအနောက်နိုင်ငံက လူမျိုးတွေထက်ပိုပြီး ဖော်ရွေခင်မင်စရာကောင်းတယ်ဆိုတာပါ။ 

 

နောက်တစ်ယောက်က ကိုယ့်အတန်းဖော်သူငယ်ချင်း အင်ဒိုနီးရှန်းတရုတ်မလေးအေမီရဲ့ အဆောင်က ပြင်သစ်သူပါ။ သူ့နာမည်ကိုယ်မမှတ်မိတော့ဘူး။ တစ်ရက်အေမီ့ဆီမှာ ညနေစာသွားစားဖြစ်ပါတယ်။ သူတို့တွေက ကိုယ့်အဆောင်က လူတွေအားလုံး သဘောကောင်းတော့ ကိုယ့်ဆီမှာပဲ လာစားတာများတယ်။ အေမီ့အဆောင်ကိုတော့ အဲဒီ့နေ့ကမှ ရောက်သွားတာ။ ထမင်းစားခန်းနဲ့တွဲရက် မီးဖိုဆောင်ကျယ်ထဲ ၀င်လိုက်ပြီဆိုတာနဲ့ စာတွေကပ်ထားတာ အများကြီးပဲ။ ရေခဲသေတ္တာအပြင်ဘက်မှာရော အတွင်းမှာရော စာတမ်းတွေနဲ့။ အေမီ့ကိုမေးကြည့်မှ အဲဒါပြင်သစ်သူကပ်ထားပါတဲ့။ သူကသိပ်စည်းကမ်းကြီးတာဆိုပဲ။ အဆောင်တွေမှာ ထုံးစံအတိုင်း လူစုံတော့ (အထူးသဖြင့် ရေခဲသေတ္တာထဲက အစားအသောက်တွေ) သူ့ဟာကိုယ့်ဟာ ရောကုန်မှာစိုးလို့ ကပ်ထားတာရော၊ ပစ္စည်းတွေကို စည်းကမ်းတကျသုံးစွဲဖို့ ညွှန်ကြားထားတာတွေဖြစ်ကြောင်း ကိုယ်သဘောပေါက်လိုက်ပါတယ်။ အဲဒီ့နေ့က သူက ပီဇာကို  ဂျူံနယ်တာကစပြီး နောက်ဆုံး ဘေစ့်လုပ်ပြီး အပေါ်မှာ ချိစ်ဖြူးတာ၊ အစာထည့်တာအထိ အစအဆုံးလုပ်သွားတာ ပီဇာကြိုက်သူကိုယ်က ငေးရတာပေါ့လေ။ သူ့မျက်နှာက ခပ်တည်တည်ပဲ။ ကိုယ်တို့ကို တွေ့တော့လည်း ဖော်ဖော်ရွေရွေသိပ်မရှိဘဲ မရယ်မပြုံးနဲ့။ သူ့အလုပ်ပဲသူလုပ်နေတာ။ သူ့ကြောင့် ကိုယ်တို့အုပ်စု နည်းနည်းအနေရခက်တာပေါ့လေ။ စားပြီးသောက်ပြီးသွားတော့ အေမီက အ၀တ်တစ်ခုယူပြီး စားပွဲကို ရေဆွတ်ပြီးသုတ်ပါတယ်။ အဲဒါကို ပြင်သစ်သူမမ မြင်တော့ အလွန်တရာအံ့သြတဲ့ မျက်လုံးမျိုးနဲ့ကြည့်လို့။ သူ့လက်သုတ်ဝတ်နဲ့ယူပြီး အားရပါးရသုတ်နေတဲ့ အေမီလည်း တန့်သွားပြီး၊ ငါတို့က ဒီလိုပဲ ထမင်းစားပြီးရင် ထမင်းစားပွဲကို သန့်ရှင်းရေးလုပ်တာ၊ different people different culture လို့ ရယ်ကျဲကျဲနဲ့ ပြောလိုက်ပါတယ်။ ပြီးတော့မှ လက်သုပ်ဝတ်ကို သေချာလျှော်ဖွတ်ပေးခဲ့ရတာ။ တော်သေးတာပေါ့ ကြည့်ရုံပဲကြည့်ပြီး ဘာမှမပြောလိုက်လို့။ တစ်ခါဆို တစ်ခါပါပဲ နောက်ထပ် အေမီ့အဆောင်မှာ ထမင်းမစားဖြစ်တော့ပါဘူး။ စည်းကမ်းကြီးတဲ့ ပြင်သစ်အဆောင်သူမမကို ကိုယ်တို့အားလုံး လန့်သွားတယ်ဆိုတာ ဖွင့်ပြောစရာမလိုဘဲ သိလိုက်ပါတယ်။

နောက်နှစ်မှာတော့ အပြင်ဆောင်ကို ရွှေ့ရပါတယ်။ ကျောင်းနဲ့မနီးမဝေးက လုံးချင်းအိမ်လေးတွေမှာ ကျောင်းသားတွေစုပြီး နေကြတာပါ။ ကိုယ်နေရတဲ့အဆောင်မှာ အင်္ဂလိပ်သူ ကလယ်ရာနဲ့ ကိုယ်တို့နှစ်ယောက်ပဲ မိန်းကလေးပါ။ ကျန်တဲ့သုံးယောက်က ယောက်ျားလေးတွေပါ။ တရုတ်ပြည်မကြီးက တိုနီ၊ ဂရိနိုင်ငံသား ဂျော်ဂျီနဲ့ အင်္ဂလန်တောင်ပိုင်းက ကျွန်းသား အက်ဒ်ဝုဒ်တို့ပါ။ သူတို့တွေအားလုံး သဘောကောင်းကြပါတယ်။

မိသားစုအရေးသိပ်မပြေလည်သူ၊ ချွေတာတတ်သူ ကလယ်ရာက တစ်နေကုန်ကျောင်းတက်၊ ရသလောက် အချိန်ပိုင်း အလုပ်လုပ်ပြီး ပိုက်ဆံစုသူပါ။ နွေရာသီကျောင်းပိတ်ရက်မှာ စုထားတဲ့ပိုက်ဆံနဲ့ တစ်နေရာရာကို ခရီးထွက်လေ့ရှိပါတယ်။ ကိုယ်နဲ့မတွေ့ခင်နှစ်က အရှေ့တောင်အာရှတစ်ဝိုက် ခရီးထွက်ခဲ့သူပါ။ မြန်မာနိုင်ငံကို ထိုင်းနိုင်ငံဘော်ဒါကတစ်ဆင့် ၀င်ရောက်လည်ပတ်ကြည့်ချင်ပေမယ့် ဗီဇာအလွယ်တကူမရလို့ ၀င်မလည်ခဲ့ရကြောင်း၊ ကမ္ဘောဒီးယားကတော့ ဗီဇာလွယ်လို့ ၀င်လည်ဖြစ်ခဲ့ကြောင်း ပြောပြပါတယ်။ အမေရိကကို သွားလည်တုန်းက အင်္ဂလိပ်နဲ့ အမေရိကန် လေယူလေသိမ်းအတော်ကွာခြားပုံ၊ ဓလေ့စရိုက်ကွဲပြားပုံတွေ တွေ့ရတော့ သူတော်တော် အံ့အား သင့်မိကြောင်း ကိုယ့်ကိုပြောပြပါသေးတယ်။  သူ့ boyfriend က စနေ၊ တနင်္ဂနွေဆို လာတတ်ပါတယ်။ တစ်ချို့အပတ်တွေမှာတော့ သူတို့နှစ်ယောက် အင်္ဂလန်နိုင်ငံထဲက အခြားတစ်မြို့မြို့ကို သွားလည်ကြပါတယ်။ သူနဲ့ သူ့ boyfriend ပြတ်သွားတာ ကိုယ်မသိလိုက်ပါဘူး။ ကိုယ်မမြင်ဘူးတဲ့ ကောင်လေးနောက်တစ်ယောက် သူ့ဆီလာလည်နေတာတော့ တွေ့ပါတယ်။ ကိုယ်နဲ့တွေ့တော့ သူ့ cousin လို့ မိတ်ဆက်ပေးပါတယ်။ ကိုယ်လည်း ယုံပါတယ်။ ဒါပေမယ့် တစ်ခုသောညခင်းအပြီးမှာ အဲဒီ့ကောင်လေးဟာ သူ့ cousin မဟုတ်နိုင်ကြောင်း ကိုယ်သိသွားပါတယ်။ သူ့ဘာလို့များ ကိုယ့်ကိုလိမ်ခဲ့ရတာပါလိမ့်လို့ စဉ်းစားမရဖြစ်ခဲ့ပါတယ်။ အဲဒီ့နှစ် နွေရာသီ ကျောင်းပိတ်ရက်မှာတော့ သူနဲ့သူ့ငယ်ချင်းတို့ သွားလည်ဖို့ ရွေးချယ်ခဲ့တဲ့ နိုင်ငံက ကျူးဘားဆိုတာ ကိုယ်မှတ်မိလိုက်ပါတယ်။

ရေမြေခြားက အဆောင်သားများအကြောင်းကို မနက်ဖြန်မှာ ဆက်ပါ့မယ်။


ချစ်ခင်လေးစားလျက်
ဇွန်မိုးစက်

 (က)

ကျယ်ဝန်းစိမ်းစိုလှပသော အလယ်ပန်းခြံအတွင်းက တစ်ခုသောရေကန်အနီးရှိ ခုံတန်းလေးမှာ “ငယ်” ထိုင်ရင်း ပြာလွင်သော ကောင်းကင်ကို မော့ကြည့်နေမိသည်မှာ ဘယ်လောက်ကြာသွားသည်မသိ။ ဆူညံစွာ အော်ဟစ် ပြောဆိုနေကြသော ကလေးတစ်သိုက်အသံကြားမှ ပတ်ဝန်းကျင်ကို ပြန်ကြည့်မိသည်။ သာယာသော နွေရာသီ ညနေခင်းမို့ ထင်သည်၊ ဧကရှစ်ရာကျော် ကျယ်ဝန်းလှသော ပန်းခြံတစ်ခုလုံးမှာ  သူ့နေရာနှင့်သူ လာရောက်အပန်းဖြေ အနားယူကြသူ လူကြီးလူငယ် လူရွယ်စုံဖြင့် စည်ကားလို့နေသည်။ ငယ့်ရှေ့မှာ ဖြတ်သန်းသွားလာ ကစားနေကြသော ကလေးများကို ကြည့်ယင်း ကြည်နူးမိသည်။ နာရီကြည့်မိတော့ ၆နာရီထိုးရန် ဆယ်မိနစ်ခန့်မျှသာ လိုတော့သည်။ အစောပိုင်းက ပန်းခြံထဲလျှောက်သွားပြီး ရိုက်ထားသော ဓာတ်ပုံများကို ပြန်ကြည့်နေရင်း ကိုကို့အကြောင်းတွေးမိသည်။

ကိုကိုနှင့်ငယ်မတွေ့ရသည်မှာ ဆယ်စုနှစ်တစ်ခုနီးပါးမျှ ကြာခဲ့ပြီ။ အချိန်တွေ တရွေ့ရွေ့ကုန်လွန်ရင်း အဝေးကြီးကို ထွက်သွားသည့် ကိုကို့ကို တစ်နေနေ့မှာ ငယ် ရောက်အောင်သွားတွေ့မည်ဟု ဆုံးဖြတ်ထားခဲ့သည်မှာ ကိုကိုဒီမြို့ကို စရောက်တဲ့နေ့ကတည်းကလေ။ တကယ်ဆို ကိုကိုနှင့်ငယ်သည် တစ်ဦးခံစားချက် တစ်ဦးနားလည်ခဲ့ပြီး အခြေအနေအကြောင်းကြောင်းကြောင့် ဆုံဆည်းခွင့် မရနိုင်ခဲ့သူတွေလို့  ဆိုနိုင်ပါသည်။ ငယ့်ဘ၀မှာ ကိုကိုနှင့် ပတ်သက်ပြီး ကဗျာတစ်ပုဒ်တည်းသာ စပ်ဖူးသည်။ ကိုကိုစာမေးပွဲတစ်ခုဖြေပြီးသည့် နောက်ဆုံးနေ့က ကိုကို့ကို သွားတွေ့အပြီး ထိုကဗျာလေးကို ပေးခဲ့သည်။ ကဗျာထဲမှာ ကိုကို့ကို ချစ်ကြောင်း၊ နှစ်သက်ကြောင်း မပါခဲ့။ ကိုကိုငယ့်အပေါ်ထားခဲ့သည့် စေတနာတွေအတွက် ကျေးဇူးတင်ကြောင်း၊  ကိုကို့ကို တစ်သက်လုံး သတိရနေမည့် အကြောင်းတွေတော့ပါသည်။ ခုဆို အဲဒီ့ကဗျာလေး ကိုကို မေ့လောက်ရောပေါ့။

ကိုကိုနှင့်မိုင်ပေါင်းထောင်ချီဝေးနေခဲ့သော ကာလတွေမှာ ကောင်းကင်ပြာပြာကို ကြည့်၍ ငယ်အားတင်းခဲ့သည်။ ဘယ်လောက်ဝေးဝေး ငယ်တို့အားလုံးဟာ မိုးကောင်းကင်တစ်ခုအောက်မှာ ရှိနေကြတာမဟုတ်လား။ တစ်နေ့နေ့တော့ တစ်ခုသောကောင်းကင်ပြာအောက်မှာ ငယ်တို့ပြန်ဆုံခွင့်ရဖို့ မျှော်လင့်ခဲ့သည်။ ခုတော့ ငယ့်အိပ်မက်ကို လက်တွေ့ အကောင်အထည် ဖော်နိုင်ခဲ့ပြီ။ “ဘုတ်” ဆိုသော အသံနှင့်အတူ ငယ်ထိုင်ရာနေရာနားသို့ ဘောလုံးတစ်လုံး ကျရောက်လာသောကြောင့်  ငယ့်အတွေးတွေ ပြတ်တောက်သွားသည်။ ချစ်စရာ ကလေးငယ်လေးတစ်ဦး ငယ့်ဘေးမှာကျနေသော ဘောလုံးကို လာပြန်ယူပြီး ပြေးထွက်သွားသည်။ ကလေးလေးသွားရာ လမ်းတစ်လျှောက် အမှတ်မထင် ငယ်ကြည့်မိတော့.... အို ... ဟိုမှာ....။ ၆နာရီ ထိုးပြီပဲ။ ကိုကိုသည် အချိန်တိကျ လေးစားသူတစ်ဦး ဖြစ်ကြောင်း ငယ် အမှတ်ရသွားသည်။

(ခ)

“ကိုကို” ဟု ငယ့်နှုတ်မှ တိုးတိတ်စွာ ရေရွတ်မိသည်။ ကိုကိုက ငယ်ရှိရာသို့ ဖြေးဖြေးချင်း လှမ်းလာနေသည်။ ကိုကိုအရင်ကထက် အသားပိုဖြူပြီး ပိုဝလာသည်။ ပါဝါထူထူ မျက်မှန်တစ်စုံအောက်က ကိုကို့မျက်ဝန်းတွေက အရင်အတိုင်း နူးညံ့ကြင်နာ ခင်မင်စရာကောင်းဆဲ။ ကိုကိုက ဟိုတုန်းကလို ငယ့်ကို ခေါ်နေကျအတိုင်း “ညီမလေး” ဟု ခေါ်၍  ငယ့်ခေါင်းကို အသာဖွဖွပုတ်ကာ ငယ့်ဘေးမှာ ၀င်ထိုင်သည်။  ဒီလိုခေါ်သံမကြားရတာ ဘယ်လောက်တောင် ကြာခဲ့ပြီလဲ။ ငယ့်ရင်ထဲမှာ နွေးထွေးမှုတွေ အရှိန်အဟုန်ဖြင့် ဖြတ်စီးသွားသည်။ ကောင်းကင်ကြီး ရုတ်တရက် အရောင်ပြောင်းလဲသွားသည်။ လောကတစ်ခွင်လုံး အခိုက်အတန့်မျှ တိတ်ဆိတ်သွားသည်။ အရောင်အသွေးစုံပန်းတွေ အပြိုင်အဆိုင် ဖူးပွင့်သွားသည်။ ငယ့်ဘ၀မှာ သိပ်ကိုလှပ အမှတ်ရစရာကောင်းခဲ့တဲ့ အချိန်တစ်ခုပေါ့ ကိုကိုရယ်။ 

(ဂ)

ကိုကို ငယ့်ကို လာတွေ့တာ သိပ်ကျေးဇူးတင်ပါတယ်။ ကိုကိုတစ်ယောက်တည်းလာခဲ့လို့လည်း ပိုပြီးကျေးဇူးတင်မိပါတယ်။ ငယ်သူ့ကို မတွေ့ချင်တာထက် ကိုကိုတစ်ယောက်တည်းကိုပဲ တွေ့ချင်တဲ့ ဆန္ဒရှိခဲ့တာ ကိုကိုနားလည်မှာပါ။ ကိုကိုနှင့်ငယ် စကားတွေ တစ်ဝကြီး ပြောဖြစ်ခဲ့သည်။ ငယ်တို့နှစ်ယောက် နောက်ထပ် ဒီလိုဆုံတွေ့ခွင့်ရဖို့ဆိုတာ မသေချာတော့။ တကယ်ဆို  ကိုကိုလက်ထပ်ပြီးကြောင်း ငယ်သိခဲ့သည်ပဲ။ ကိုကို့ကို ငယ်အပြစ်ဆိုစရာ မလိုပါ။ ကိုကို့ဘ၀နှင့် ကိုကိုရွေးချယ်ခွင့်ရှိသည်ပဲလေ။ ငယ့်ဘ၀မှာ ကိုကိုတစ်ယောက်တည်းကိုသာ မေတ္တာစစ်နှင့် ချစ်ခဲ့မိကြောင်း  ဖွင့်ပြောရန်မလိုအပ်တော့။ အချစ်နှင့်မေတ္တာကို ကွဲပြားနားလည်တတ်ခဲ့သည်မှာ ကိုကို့ကြောင့်လို့တော့ ၀န်ခံမိချင်သား။ တစ်ချိန်က ကိုကိုပြောခဲ့ဖူးတဲ့၊ ငယ့်ဘ၀ကို  အချိန်ကာလတစ်ခုအထိ ချည်နှောင်ခဲ့ဖူးတဲ့ စကားလေးတစ်ခွန်း ပြန်အမှတ်ရမိသည်။ “ညီမလေး ... တစ်ခါတစ်ရံမှာ လက်မထပ်ဖြစ်တဲ့ အချစ်တွေဟာ ပိုခိုင်မြဲတယ်”။

(ဃ)

မကြာခင်အချိန်အတွင်းမှာ ဒီမြို့တော်မှ ငယ် ထွက်ခွာတော့မည်။ တစ်နည်းအားဖြင့် ကိုကို အခြေချ နေထိုင်ရာ မြို့တော်ကနေ မိုင်ပေါင်း မြောက်မြားစွာဝေးကွာသော ငယ့်ဌာနေကို ပြန်ရတော့မည်။ ကိုကို့ကို ဖုန်းဖြင့်သာ နှုတ်ဆက်စကား ပြောကြားပြီး တက္ကဆီပေါ်မှာ တိတ်ဆိတ်စွာ ငယ်လိုက်ပါလာခဲ့သည်။ ရုပ်ရှင်တွေထဲမှာ အကြိမ်ကြိမ် ရင်းနှီးဖူးသော ဒီမြို့ကြီးကို ကိုယ်တိုင်ကိုယ်ကျ အရောက်လာနိုင်ခဲ့၍ ငယ်ကျေနပ်သည်။ ကိုကိုနှင့် တွေ့ခွင့်ရသည့်အတွက်လည်း ပိုကျေနပ်သည်။ ငယ်တစ်ချိန်က စိတ်ကူးယဉ် မျှော်လင့်ခဲ့သလို ပျော်ရွှင်စရာကောင်းသော အဆုံးသတ်တော့ မဟုတ်ခဲ့။

အင်ပါယာစတိတ် အဆောက်အဦပေါ်ကို ကိုကိုနှင့်အတူ တက်ကြည့်ခွင့် မရခဲ့။  အလယ်ပန်းခြံထဲမှာ ကိုကိုနှင့်အတူ လက်တွဲလျှောက်ခွင့် မရခဲ့။ လေဘာတီရုပ်ထုရှိရာကျွန်း နောက်ခံထားပြီး ကိုကိုနှင့်အတူ  နှစ်ယောက်တွဲ၍ ဓာတ်ပုံရိုက်ခွင့် မရခဲ့။ ဖြစ်နိုင်မယ်ဆိုရင်လေ ... “ကိတ်အန်လီယိုပိုး” ဇာတ်ကားထဲလို ဘရွတ်ကလင်းတံတားအောက်နားကို အသာခုန်ဆင်းလို့ အချိန်တွေကို နောက်ပြန်လှည့်ပြီး  ကိုကိုနဲ့အတူ မက်ဟန်တန်မြို့ထဲ လှည့်ပတ်ကြည့်ချင်သေးတယ်။  ပဉ္စမရိပ်သာလမ်းမတစ်လျှောက် ကိုကိုလိုက်ပြသမျှ  အသစ်အဆန်းတွေအားလုံး ကလေးငယ်တစ်ယောက်တစ်ဖွယ် ငေးမောကြည့်ချင်မိသေးတယ်။ တကယ့်တော့ ဒါတွေအားလုံး မဖြစ်နိုင်တော့မှန်း ငယ်သိခဲ့ပါတယ် ကိုကိုရယ်။ ငယ့်အမြင်တွေ ၀ိုးတ၀ါးနဲ့ မှုန်ရီမှိုင်းလာခဲ့သည်။

(င)

လေယာဉ်ပေါ်ကနေ ကိုကိုနှင့်တစ်စုံတစ်ယောက် အတူရှိနေမည့်မြို့ကို နောက်ဆုံးအကြိမ် လှမ်းမျှော်ကြည့်ရင်း ကိုကို့ကို မမေးဖြစ်လိုက်သောမေးခွန်းကို ရင်ထဲမှာပဲ တိတ်တဆိတ် ပြန်မေးမိသည်။ ကိုကိုရေ... လက်မထပ်ဖြစ်တဲ့ ချစ်ခြင်းတွေဟာ တစ်ကယ်ပဲ ခိုင်မြဲတတ်သလားဆိုတာ ငယ်သိချင်ပါတယ်။  ဒါပေမယ့်လေ ....   ဒီဘ၀မှာ ကိုကိုနဲ့ ဆုံခွင့်မရတော့မယ့်အတူတူ ကိုကို့အပေါ်ထားခဲ့မိတဲ့ ငယ့်ချစ်ခြင်းမေတ္တာတွေကို ဟောဒီ့မြို့တော်မှာပဲ  အပြီးအပိုင် ထားရစ်ခဲ့ပါရစေ။ ကိုကိုလည်း ချစ်တဲ့မိသားစုနဲ့အတူ ပျော်ရွှင်စွာ နေရစ်ခဲ့ပါတော့ ... ။

ဇွန်မိုးစက်

(ဒီဝတ္ထုလေးကို စိတ်ကူးထဲမှာ ရေးခဲ့မိတာ လွန်ခဲ့တဲ့ ၆နှစ်လောက်ကပါ။ ကိုယ်သိပ်ရောက်ဖူးချင်တဲ့ နယူးယောက်ခ်မြို့ကို နောက်ခံထားပြီး ချစ်တဲ့သူနဲ့ပျော်ရွှင်စွာ ပြန်လည်ဆုံတွေ့ခွင့်ရတဲ့ ကောင်မလေးအကြောင်း ရေးချင်ခဲ့တာပါ။ အချိန်ကာလတွေ၊ အခြေအနေတွေ ပြောင်းလဲခဲ့တဲ့အလျောက်  စာရေးသူ ခံစားချက်လည်း လိုက်ပြောင်းသွားတော့ စိတ်ကူးထဲက ဇာတ်သိမ်းနဲ့ ကွဲလွဲသွားကြောင်းပါ။)

ပုံလေးကို ဒီကနေ ယူထားပါတယ်။

ကျွန်တော့်ကို အမေက နွေဦး (ကုမ်ရာသီ) မှာ မွေးခဲ့လို့လား မပြောတတ်ပါ။ နွေဦးကိုရောက်တိုင်း ခံစားမှု တစ်မျိုး လွင့်လာတတ်ကာ အလွန်စွဲလန်းသော အာရုံဖြင့် ရှိနေတတ်ပါသည်။ နွေဦးဝင်ပြီဆိုသည်နှင့် တိုက်မြဲ မြောက်လေကလေး ဖယ်ဆုတ်ရာက တောင်လေကလေး သုန်လာတတ်သည်။ အမေက ဘာလိုလိုနဲ့ တောင်လေကလေးတောင် သွေးပြန်ပါပကောလို့ မှတ်မှတ်ရရ ပြောတတ်မြဲလည်း ဖြစ်သည်။ တောင်လေကလေး ပြက်သည်နှင့် နွေနံ့တွေ ကြိုင်ကြိုင်လှောက်လာတော့သည်။ နွေ၏ရနံ့သည် ပန်းရနံ့တွေလည်းမဟုတ်၊ ဖုန်ခိုး မီးနံ့လည်းမဟုတ်။ မြေခိုးမြေငွေ့တွေ အူလာလို့လည်းမဟုတ်။ နွေဦးရာသီကပဲ သယ်ဆောင်လာသည့် သဘာဝရနံ့ဖြစ်သည်။ နွေလေကပဲ သစ်ရွက်ဟောင်းတွေ ခြွေချပေးသည်။ ရွက်ခြွေလေ တစ်ချက်သုတ်လိုက်သည်နှင့် ရွက်ဟောင်းတွေ ဝေ့ဝေ့၀ဲဝဲ ကြွေကြရသည်။ ကျွန်တော်တို့ငယ်ငယ်က သစ်ရွက်ကြွေဖမ်းတမ်း ကစားကြသည်။ မှို့သီးလဲသီးကွဲတွေက လွင့်ပါလာတတ်ကြသော လဲစမှို့စ လူးလူးလိမ့်လိမ့်ကလေးတွေကို လိုက်ဖမ်းရတာကလည်း ပျော်စရာ ဖြစ်ရသည်။ နွေဦးမှာ မွှေ့တတ်ဝှေ့တတ်သော လေပွေခေါ်ကြသည့် “လေပူကတော့” ကို ကျွန်တော် ကြောက်တတ်သည်ဟု အမေပြောဖူးသည်။ “လေပူကတော့” ကြီးတွေက အချိန်အခါမရွေး၊ နေရာမရွေး လေပူချင်း ဆိုင်မိလျှင် ဖုန်နှင့် အမှိုက်တွေကို ဆွဲတင်သွားတတ်တာကို ကလေးပီပီ ကြောက်ခဲ့တာဖြစ်လိမ့်မည်။ ကျွန်တော်တို့ခြံထဲက မာလကာပင်၊ သြဇာပင်၊ ဂွေးသီးပင်၊ သလဲပင် တွေကလည်း အရွက်တွေမကျန်အောင် “ခါ” တတ်သည်။ ညအခါ ကောင်းကင်ရောင်နောက်ခံမှာ အရိုးစုကြီးတွေ ရပ်နေကြသည်နှင့်တူသည်။

စည်းရိုးစပ်မှာရှိကြသော ငုပင်နှင့်ပေါက်ပင်ကတော့ တစ်မျိုးလှကြသည်။ ငုဝါရောင်က ပိတောက်နှင့်မတူ။ ရွှင်သော အ၀ါရောင်ဖြစ်သည်။ ငုတစ်ပင်လုံး ခဲနေအောင် ပွင့်သည့်အတွက် မြင်ရသည်ပင် ခူးချင့်စဖွယ်။ ပေါက်ကတော့ အပင်ကြီးမျိုးဖြစ်သည်။ ပွင့်စမှာ နီနီမြန်းမြန်း၊ တစ်ရက်နှစ်ရက်ကြာတော့ လိမ္မော်ရောင်ဘက်ကူးကာ တစ်သွေး လှနေတော့သည်။ နွေဦးမှာ အမှတ်တရအရှိဆုံးကတော့ ဥသြတွန်သံဖြစ်သည်။ ဥသြတွန်သံကို ခံစားမိရခြင်းမှာလည်း အဓိပ္ပာယ်ရှိသည်။ ဥသြတွေ တွန်ပြီဆိုလျှင် အဖေရောက်လာတော့မည်။ ကျွန်တော် လူမှန်းသိစကတည်းက အဖေက ရန်ကုန်မှာ အလုပ်လုပ်နေသည်။ ကျွန်တော်နှင့်အမေက ရွာမှာ။ တစ်နှစ်တစ်ခါ နွေကျောင်းပိတ်ချိန်မှာ အဖေ ရောက်လာတတ်သည်။ ဟိုတုန်းက သည်ခေတ်လို သွားရေးလာရေး လွယ်လှသည်မဟုတ်။ ရန်ကုန် ပြည် ဘတ်စ်ကား စီးရသည်။ ပြည်ရောက်တော့ တစ်ညအိပ်။ ပြည် ကူးတို့ သဘောင်္ကြီးတွေ စီးကာ သင်္ဘောပေါ်မှာ တစ်ညအိပ်။ သံကိုင်းဆိပ်ကိုရောက်မှ ဆင်းကာ မြင်းလှည်းနှင့် ကုန်းဇောင်းကို လာရသည်။ အဖေရောက်လာတော့ စစ်သုံးတာပေါ်လင် အိပ်ရာလိပ်ကြီးပါသည်။ တစ်လုံးချိုင့်ခေါ်သည့် ထမင်းချိုင့်ပါသည်။ အ၀တ်အစားတွေကတော့ အိပ်ရာလိပ်ထဲမှာ။ အဖေ့အကြောင်း ကျွန်တော်ရေးလျှင် သည်အရုပ်တွေ အရိပ်တွေ မပါလို့မရ။ မက်ဆိုပိုတေးမီးယား စစ်မြေပြင်က ပြန်လာသော ဂျမဒါတစ်ယောက်နှင့်တူသည်ဟု ကျွန်တော်ရေးဖူးသည်။ အဖေရောက်လာသည့်ရက်တွေက နွေဦး။ ဥသြတွန်တဲ့ လရာသီ။ နှစ်စဉ် ဥသြတွန်သံကြားလျှင် အမေက “မင်းအဖေ လာတော့မယ်” လို့ ပြောတတ်သည်။ အမေလည်း ဥသြတွန်သံကို မျှော်နေတာများလား။

ဥသြတွန်သံက ချိုမြိန်သော အလွမ်းဓာတ်ကလေး ပါသည်။ အလွမ်းဓာတ်ကဲသော သံချိုလို့လည်း ပြောနိုင်သည်။

ဥသြသံက နွေဦး၏ ဖွားဖက်တော်ဖြစ်သည်။

ရှင်အုံးညို၏ ဂါထာ ၆၀ ပျို့မှာ “ရဂုံတောဝယ်၊ ဥသြကျေးငှက်၊ ယှဉ်ဖက်မကွာ၊ ဟင်္သာပဲထွေး၊ သံလေးကျူးဆင့်၊ ကြွေးရင့်မညံ” လို့ ဖွဲ့သည်။ “ကြွေးရင့်မညံ” သည် မဆူမညံ နားချမ်းသာသော အသံကို ဆိုလိုပုံရသည်။ ကွမ်းရေတော်ကိုင် ဦးယာကတော့ ဥသြကို အလွမ်းဘက်ကို ကူးကာ ခံစားသည်။ သူ၏တပေါင်းလ ဘွဲ့တစ်ပုဒ်မှာ “မြိုင်ခွင်တစ်ကြော၊ ဥသြရင့်ကြွေး၊ ကျူးသံပေးလျက်၊ လွမ်းရေးဖြာဖြာ၊ ရွှေသည်းညှာလည်း၊ ကြွေရှာလုဖွယ်” လို့ ဖွဲ့သည်။ အသည်းကြွေမတတ် ခံစားရသော မြိုင်ဦးက ဥသြသံကို သူလည်း ခံစားပုံရသည်။

ဥရောပနွေဦးကို ကျွန်တော် ကြုံခဲ့ဖူးသည်။ သူတို့ နွေဦးကို သူတို့ကလည်း မျှော်မောတကြီး ရှိကြတာ သတိထားမိပါသည်။ သူတို့နွေဦးဆိုသော်လည်း သူတို့ပထ၀ီနှင့် အစပ်မတည့်လှသော ကျွန်တော့်အဖို့ နွေဦးလို့မထင်။ ပြင်သစ်နိုင်ငံ အနောက်ပိုင်းမှာ သမုဒ္ဒရာပိုင်းရာသီဥတုရှိသည်။ တောင်ပိုင်းမှာက မြေထဲပင်လယ်ရာသီဥတု။ အရှေ့နှင့် ဗဟိုပိုင်းမှာတော့ ကွန်တီနင်တယ် ရာသီဥတု ခေါ်ကြသည်။ ကုန်းမြေထုနှင့်ဆိုင်သော ရာသီဥတု ဖြစ်လိမ့်မည်။ မည်သို့ပင်ဖြစ်စေ သူတို့တစ်နိုင်ငံလုံး၏ နွေဦးသည် အေးမြ၍ ခြောက်သွေ့သော လေတွေ တိုက်နေတတ်သည်။ ဆီးနှင်းမိုး ရွာတတ်သော နွေဦးဖြစ်သည်။ မိုးနှင့် နှင်းကြွင်း၊ မြူနှင့် ဆောင်းနံ့ထုံသောရာသီကို နွေဦး ခေါ်နေကြသည်။ နွေဦးမှာမှ မြင်ရတတ်သော သစ်ရွက်တွေကတော့ အရောင်ဆန်းပါသည်။ ဒန်ရောင်၊ ဖန်ရောင်၊ သံမဏိရောင်တွေပင် ပါလိုက်သေးသည်။ ပါရီမှာပင် သဘာဝသစ်တော၊ မြို့လယ်ရပ်ကွက်အလိုက်သစ်တော၊ အမျိုးသားသစ်တော စသည်ဖြင့်ရှိသည်။ သဘာဝ သစ်တောများကို ပသာဒဖြစ်အောင် ပြုပြင်ထားသဖြင့် စိုက်ခင်းသစ်တော ထင်စရာရှိသော်လည်း တောကြီးဟေ၀န်မှန်း သိသာပါသည်။ ကျွန်တော် သတိထားမိသလောက်တော့ အောက်ချင်းသောင်းသောင်း၊ ဥဒေါင်းထိတ်ထိတ်၊ ကရ၀ိတ်သံသာ၊ ခါလည်းငေါ်ငေါ်၊ ငှက်တော်သဲသဲ၊ လင်းဆွဲသက်သက်၊ ဆက်ရက်လေးမျိုး၊ ကျေးရှစ်မျိုးနှင့် ချိုးမျိုးလေးတန်၊ သိန်းစွန် ခင်ပုပ်တို့ မြိုင်လုံးချုပ်အောင် ရှိနိုင်သော်လည်း သည်ကန္တာတောခြေတွေမှာ နွေဦးဥသြသံ မကြားခဲ့ရ။ ဥရောပကဗျာတွေမှာ ဥသြ (cuckoo)၊ ဥသြသံထွက်သည့် သံစုံနာရီ (cuckoo clock) ဆိုတာတွေ ကျွန်တော်ဖတ်ဖူးပါလျက် ဥသြသံကို အကြောင်းမဆိုက်၍ဘဲလားမသိ။ ကျွန်တော် မကြားခဲ့ရိုး အမှန်။

မနေ့တစ်နေ့ကမှ ရောက်ခဲ့ရသော မလေးရှားနိုင်ငံ၊ စင်္ကာပူနိုင်ငံတွေမှာတော့ ဥသြသံတွေ အီလောက်အောင် ကြားခဲ့ရသည်။ ဥသြသံမှ ဥသြတွန်သံအစစ်။ အထပ်မြင့်တိုက်ခန်းတွေမှာ နေခွင့်ရခဲ့သဖြင့် ကွာလာလမ်ပူတစ်မြို့လုံးကို ဆီးမြင်နေရသော ကျွန်တော့်မှာ သည်ဥသြသံ ဘယ်ကလာသလဲ မရှာတတ်အောင် ဖြစ်နေရသည်။ ကျွန်တော် မြင်ရသလောက် အထပ်အထပ် လမ်းမကြီးတွေ၊ မြင့်မားသော မိုးမျှော်တိုက်ကြီးတွေ၊ ကွန်ကရိ တံတားကြီးတွေသာ ရှိသည်။ ရှိနေသည့် သစ်ပင်တွေကလည်း ဥသြခိုလောက်စရာ မရှိ။ တောမြိုင်ခြေလမ်း မဟုတ်။

“ဥသြသံက သည်မှာ ဆယ့်နှစ်ရာသီကြားရတယ်။ ကျွန်တော်တို့လည်း ရောက်စက ဥသြသံကြားတော့ ဇာတိ လွမ်းရသေးတယ်။ မဟုတ်ဘူးဗျ၊ ဥသြက တစ်နှစ်လုံး တွန်နေတာ။ အီကွေတာရာသီဥတု ရှိလို့လားတော့ မပြော တတ်ဘူး”

မလေးရှားရောက် မြန်မာမိတ်ဆွေတွေက ပြောပြခြင်းဖြစ်သည်။ မလေးရှားတွင်နေရသည့် ရက်များအတွင်း ကွာလာလမ်ပူမြို့ကြီး၏ တောင်ပိုင်းမှာရော မြောက်ပိုင်းမှာပါ တည်းခိုခွင့် ရခဲ့ပါသည်။ ဥသြသံကိုတော့ နေရာတိုင်းမှာ ကြားခဲ့ရသည်။ ကေဒါ (ကဒါး) ပြည်နယ်၊ ဆလန်ဂေါပြည်နယ်တွေ ရောက်တော့လည်း ကြားခဲ့ရသည်။ တောစိုး သစ်ပင်ကြီးတွေပေါ်က တဖွဲ့တနွဲ့ လွမ်းယဲ့ယဲ့ကြားရတာမျိုးတော့ မဟုတ်။ ဖုတ်ပူမီးတိုက် တွန်းသံမျိုးဖြစ်သည်။ မလေးရှားသည် ပထ၀ီဝင်အရ ပင်လယ်လွှမ်းမိုးမှုရှိသော ရာသီဥတုရှိသည်။ အိန္ဒိယသမုဒ္ဒရာလေထုနှင့် တောင်တရုတ် ပင်လယ်လေထုက ရာသီဥတုနှစ်မျိုးကို ဖြစ်ပေါ်စေသည်။ ပျမ်းမျှ ၂၀ ဒီဂရီစင်တီဂရိတ်မှ ၃၂ ဒီဂရီ စင်တီဂရိတ်ကြားမှာ ရှိနေတတ်သည်။ ညှို့လာသောမိုးက ရွာချင်ရွာသလို လင်းလာသော နေက သာချင်သာသည်။ ပုံမှန်အားဖြင့် နွေးနွေးထွေးထွေး ရာသီဥတုမျိုးဟု ဆိုနိုင်သည်။

“အရှေ့မြောက်မုတ်သုံရာသီနဲ့ အနောက်တောင်မုတ်သုံရာသီရယ်လို့ နှစ်မျိုးရှိတယ်။ စိုထိုင်းစလည်း များတယ်။ ဒါပေမဲ့ အပူပိုင်း အီကွေတာ ရာသီဥတုရယ်လို့လည်း ရှိပြန်တယ်။ အရှေ့ဘက်ကမ်းရိုးတန်းနဲ့ အနောက်ဘက် ကမ်းရိုးတန်းတွေမှာ ခြွင်းချက်ရှိပေမဲ့ ပုံမှန်အားဖြင့် နွေဦးနဲ့ဆင်တယ်”

ဥသြတို့ မျက်စိလည်ကြပုံပေါ်သည်။ သည်တော့လည်း ကြားရဖန်များတော့ ကျွန်တော့်မှာ မချိုစကောင်း ချိုစကောင်း ဖြစ်ရသည်။ မလွမ်းစကောင်း လွမ်းစကောင်း ဖြစ်ရသည်။

စင်ကာပူမှာလည်း ဥသြသံကြားရသည်။ မြို့ပြခေတ်ဆန်မှုတွေကြားက ကြားရသော ဥသြသံကို ကျွန်တော် နားမလည်နိုင်ဘဲ ရှိခဲ့သည်။ ကျွန်တော် တည်းနေသည့်တိုက်ခန်းက ကြည့်လျှင် ကုန်သင်္ဘောကြီးတွေပေါ်ကို ကုန်သေတ္တာ ကြီးတွေ တင်ပေးနေသော စင်ကာပူဆိပ်ကမ်း လုပ်ငန်းခွင်ကြီးကို မြင်နေရသည်။ ခေတ်လွန် ဗိသုကာ အဆောက်အအုံ တွေကို မြင်နေရသည်။ သည်ကြားထဲက ဥသြတွန်သံ ကြားရခြင်းဖြစ်သည်။ လွမ်းစရာမကောင်းလိုက်ပုံများ။

သည်ရက်ထဲမှာပဲ အညာခေါင်ခေါင်နယ်မြို့ကလေးတွေဆီ ရောက်ခဲ့သည်။ ဘယ်ကိုကြည့်ကြည့် ကျောက်စရစ်ကုန်းနှင့် အင်တိုင်းတောခြောက်ကိုသာ မြင်နေရသည်။ တောခြောက်တွေထဲက တောပန်း တောင်ပန်းတွေ မြင်ရသည်။ လက်ပံပွင့် ၀တ်ရည်ချိုကို သောက်ကြရင်း မူးယစ်နေကြသော ဆက်ရက်တွေကို မြင်ရသည်။

“ကြောင်ရှာနှင့် နဘဲ၊ ရှင်ကစ္စဲနှင့် ရှင်ပါကူ၊ လဲလူ မ ဖို၊ ကုတ်ကိုနှင့် ကုတ်ဟီး၊ မန်ကျည်းနှင့် သနပ်၊ ဒဟပ်နှင့် သန်းထိမ်၊ ကျည်းဖြူနှင့် ပျဉ်းတော်သိမ်၊ လွန်လိမ်ဖလန်၊ သီးပေါင်မဲ့ ဆီးခံ၊ လက်ပံနှင့် လပ်ခုပ်၊ ကြက်မအုပ် ကြက်မောက်၊ တောရှောက်ခပေါင်း၊ ထနောင်းနှင့် ထောက်ရှာ၊ ယင်းမာနှင့် ရင်းတိုက်”

အင်တိုင်းတောကလေးတွေဆီက ဥသြသံကိုပါ ကြားရသည်။ သည်တစ်ခါတော့ အလွမ်းဓာတ်ပါသော သံအေးချိုချိုသည် ကျွန်တော့်ရင်ကို ပုတ်နှိုးလိုက်သည်။ မြန်မာ့နွေဦးနှင့် မြန်မာ့ဥသြ အတူနှောပါမှ လွမ်းရသည်ကော။


နေ၀င်းမြင့်

တစ်ပတ်မှာ တနင်္ဂနွေတစ်ရက်ကို (အကြောင်းထူးမရှိရင်) တစ်ခြားဘယ်မှမသွားဘဲ အမြဲ reserve လုပ်ထားပါတယ်။ တရားစခန်း၊ တရားပွဲနဲ့ကြုံကြိုက်တဲ့အခါမျိုး၊ နေမကောင်းတဲ့အခါ၊ ဟိုတစ်ခါ စာပေဟောပြောပွဲကို သွားတဲ့အခါမျိုးလောက်မှာ စာသင်သွားဖို့ ပျက်ကွက်ပါတယ်။  အိမ်မှာအချိန်ပြည့်မပေးနိုင်တဲ့ တနင်္ဂနွေဟာ အားလပ်ရက်မပီပေမယ့် ကိုယ်ကျေနပ်ပါတယ်။ အတိုင်းအတာတစ်ခုအထိ အချိန်ပေးရကျိုးလည်း နပ်ပါတယ်။

စိတ်ကူးယဉ်ဆရာမဘ၀မှာ ပထ၀ီနဲ့အင်္ဂလိပ်စာပဲ သင်ကြည့်ဖူးပါတယ်။ မြန်မာစာတစ်ခါမှ မသင်ဖူးပါဘူး။ မြန်မာစာကို ကိုယ်ပိုင်စာအဖြစ် ဂုဏ်ယူလေးစားတဲ့ စိတ်ရယ်၊ အဝေးရောက်ကလေးများကို မြန်မာစာတတ်စေချင်တဲ့စိတ်ရယ်၊ မြန်မာစာကတစ်ဆင့် ဘုရားစာ၊ ပါဠိစာပေတွေတတ်မြောက်ပြီး ဘာသာတရားနဲ့ ကလေးတွေကို ပိုမိုနီးစပ်စေချင်တဲ့စိတ်ရယ်ပေါင်းပြီး တစ်ပတ်မှာ လုပ်အားပေးစာသင်ချိန် ၃နာရီ (ခွဲ)၊ ခရီးအသွားအပြန် ၂နာရီ စုစုပေါင်း ၅နာရီကနေ ၆နာရီအချိန်ပေးပြီး Sembawang  က SMC  မှာ မြန်မာမိဘဖွား မြန်မာကလေးတွေကို မြန်မာစာသင်ပေး ဖြစ်ခဲ့ပါတယ်။ 

အဲဒီ့အချိန်လေးကို ကိုယ်သိပ်ကြည်နူးပါတယ်။ ကလေးတွေကို သင်ပုန်းကြီးဖတ်စာသင်ပေးရင်း ကိုယ်ကိုယ်တိုင် ငယ်ငယ်ကစာသင်ချိန်တွေ ပြန်ရောက်သွားသလို ခံစားရလို့ပါ။ ပြီးတော့  ဝေးကွာနေတဲ့ ကိုယ့်နိုင်ငံရဲ့ ယဉ်ကျေးမှု ဓလေ့ထုံးတမ်းတွေနဲ့ အဲဒီ့အချိန်ပိုင်းလေးမှာ ပိုပြီးနီးနီးစပ်စပ် ခံစားရတာလည်းပါပါတယ်။ စာသင်သားအဖြစ် စာတွေအံခဲ့တုန်းက ခံစားချက်နဲ့ အခုစာသင်သူအဖြစ် ခံစားချက်က မတူညီတော့ပါဘူး။

စာတွေသင်ပေးရင်း ကောင်းလိုက်တဲ့ မြန်မာစာသင်ရိုးညွှန်းတမ်းပါလားလို့ အကြိမ်ကြိမ်တွေးမိပါတယ်။ ချစ်စရာ့ ကဗျာလေးတွေ၊ အတုယူလိုက်နာကျင့်သုံးဖွယ် အမူအကျင့်စည်းကမ်းတွေကို သင်ခန်းစာတွေကတစ်ဆင့် ပေးသွားတာ ကိုယ်သိပ်သဘောကျပါတယ်။ ဘာသာစကား၊ စာပေတင်မက ထိန်းသိမ်းစောင့်ရှောက်ရမယ့် အသိတရားလေးတွေကို သင်ခန်းစာအလိုက် ပေးပေးသွားတာ ခုကိုယ်တိုင်စာသင်မှ သေသေချာချာပိုမြင်လာပါတယ်။

မြန်မာစာခက်တယ်လို့ ညည်းတဲ့ကလေးကညည်း၊ အသီးအနှံအရွက် သူတို့မစားဘူး၊ မမြင်ဘူးတဲ့ဟာ မေးတန်မေးနဲ့ စာသင်ခန်းလေးက ဆူညံနေပါတယ်။ ကိုယ့်မှာ မြန်မာစာတင်မက အင်္ဂလိပ်စာပါ ပြန်ပြန်နွှေးရတာ၊ သူတို့မသိတာလေးတွေ အင်္ဂလိပ်လို ပြန်ပြောလို့ရအောင်လို့။ ပဲပြုတ်မစားဖူးသူ၊ ခရမ်းသီးမသိသူ၊ ထန်းပင်မမြင်ဖူးသူ၊ လယ်ကွင်း၊ ကျေးရွာ၊ စပါးလှေ့ စတာတွေနဲ့ မရင်းနှီးတဲ့သူလေးတွေကို သူတို့မြင်အောင်သိသွားအောင် ပုံဖော်ပြောဆိုရတဲ့ ဆရာမတွေ ခေါင်းစား အလုပ်များ ပင်ပန်းကြပါတယ်။ 

ပညာရေးစနစ်ကွာခြားမှုအောက်မှာ ကြီးပြင်းလာသူတွေဖြစ်တော့ ကိုယ်တို့ငယ်ငယ်တုန်းကလို ဆရာဒါဆိုဒါ မလိုက်တာ သိသိသာသာတွေ့ရပါတယ်။ Complain သိပ်တက်တဲ့ ကလေးတွေလည်းရှိတယ်။ သင်ခန်းစာတစ်ခုမှာ “လဲနေသူ ထူပေးပါ၊ အားငယ်သူ အားပေးပါ” လို့ ဘေးက လဲနေသူကို ဆွဲထူပေးတဲ့ပုံလေးတွေ့တော့ ကိုယ့်တပည့် ကျောင်းသူလေးက ကြည့်ပြီးမေးပါတယ်။ “ဘာလို့ သူ့ဖာသာသူ မထတာလဲတဲ့”။ ကိုယ့်တုန်းကတော့ အဲလိုမတွေးမိတာ အမှန်ပါ။ လဲနေသူဆို ထူပေးရမယ်ဆိုတဲ့အသိပဲ ၀င်သွားတာ။ မြန်မာစာကို (စိတ်ပါပါ မပါပါ) ကြိုးစားသင်အံနေကြတာမြင်ရင်ပဲ စိတ်ကြည်နူးရပါတယ်။ 

မမသီတာပြောတဲ့စကားလေး အမှတ်ရမိပါတယ်။ မြန်မာစာတတ်တာမတတ်တာတစ်ပိုင်း၊ ဒါပေမယ့် စာသင်ရင်းကနေ စာတွေကတစ်ဆင့် မြန်မာပြည်နဲ့ရင်းနှီးသွားပြီး မြန်မာပြည်ချစ်စိတ်ကလေးတွေ  သူတို့ရင်ထဲမှာ ကိန်းအောင်း ၀င်ရောက်သွားတယ်ဆိုတာပါ။ ကိုယ်လည်း အဲလိုပဲ ယုံကြည်မိတယ်။ အသိအလိမ္မာပေးတဲ့ ချစ်စရာ သူငယ်တန်းဖတ်စာ တစ်ချို့ ကိုယ်ကောက်နုတ်ထားတာလေးတွေ ဖတ်ကြည့်ပါဦး။

“စားစရာ လာယူပါ။

ညီညီညာညာ လာပါ။

လုမယူရ။

အတူတူစားပါ။”

“ဖေဖေ မေမေ

မာပါစေ။

မေမေ့ စကား

အရေးထား။

ဖေဖေ့ စကား

သား လေးစား။”

“သူသည် နုနယ်၏။

လဲနေသူ ထူပေးပါ။

အားငယ်သူ အားပေးပါ။

အတူတူ သယ်ယူပါ။”

ဒီလိုဖတ်စာတွေသင်အံရင်း သူတို့ရင်ထဲ အတိုင်းအတာတစ်ခုအထိ အသိအလိမ္မာ ယဉ်ကျေးမှုဓလေ့တွေ ၀င်ရောက်ခဲ့မယ် ဆိုရင်ဖြင့် ကိုယ်ရဲ့တနင်္ဂနွေဟာ သိပ်ကို တန်ဖိုးရှိသွားမှာပါပဲလို့။


ချစ်ခင်လေးစားလျက်
ဇွန်မိုးစက်