အရင်နှစ်တွေမှာ Blog Day အမှတ်တရအတွက်
ဇွန်နဲ့ဆုံခဲ့ဖူးတဲ့ ဘလော့ဂ်ရွာသူ၊ ရွာသားများအကြောင်းကို ရေးလေ့ရှိပါတယ်။ တကယ်တမ်း
ဘလော့ဂ်ဒေးမှာ ဘလော့ဂ်အမှတ်တရစာများအပြင် ဘလော့ဂ်အသစ်များကို မိတ်ဆက်ပေးတဲ့ အစဉ်အလာရှိခဲ့ပေမယ့်
ဇွန့်အနေနဲ့ ဘလော့ဂ်အသစ်များကို သိပ်မသိခဲ့တာကြောင့် မိတ်ဆက်ပေးတာမျိုး မရှိခဲ့ပါဘူး။
ဒီနှစ်ဘလော့ဂ်ဒေးအတွက်တော့ ဇွန်ရေးနေကျအတိုင်း ဆုံခဲ့ရတဲ့ ဘလော့ဂါတချို့အပြင် မျှဝေချင်တဲ့
ဘလော့ဂ်တစ်ခု ရှိလာပါတယ်။ အဲဒါနဲ့ဆက်စပ်နေတဲ့ နောက်ထပ်အကြောင်းရာတစ်ခုကိုလည်း ရေးချင်စိတ်ပေါ်လာတာမို့
ဒီပို့စ်လေးကို အပိုင်းသုံးပိုင်းခွဲပြီး ရေးလိုက်ရပါတယ်။
Blogger
ပြီးခဲ့တဲ့နှစ် 31st
August 2013 မှာ ကျရောက်ခဲ့တဲ့ Blog Day နောက်ပိုင်းကနေ အခုဒီစာကို ဇွန်ရေးနေချိန်
30th August 2014 အထိ တစ်နှစ်တိတိအတွင်းမှာ ထပ်မံတွေ့ဆုံခဲ့ရတဲ့ ဘလော့ဂါအစ်မနှစ်ယောက်
ရှိပါတယ်။ အစ်မတီတီဆွိနဲ့ အစ်မမေ (မေဓာဝီ) တို့ပါ။ အစ်မတီတီဆွိနဲ့ စင်္ကာပူမှာ တစ်ခါမှ
လူချင်းမဆုံဖြစ်ခဲ့ဘဲ ဆစ်ဒနီရောက်မှ ဆုံဖူးတာပါ။ ပြီးခဲ့တဲ့နှစ် အောက်တိုဘာလမှာ ပြုလုပ်ကျင်းပခဲ့တဲ့
ဆစ်ဒနီပဏ္ဍိတရာမကျောင်းတိုက်ရဲ့ ကထိန်သင်္ကန်းကပ်ပွဲမှာ အစ်မနဲ့ စတွေ့ခဲ့ပါတယ်။ ဖော်ရွေသွက်လက်တဲ့အစ်မဆွိနဲ့အတူ
သဘောကောင်းတဲ့ဦးခြိမ့်ရော ချစ်စရာကောင်းတဲ့ဂျူဂျူလေးကိုပါ သိခွင့်ရခဲ့ပါတယ်။ ၂၀၁၄
နှစ်ဆန်းပိုင်းမှာ ပဏ္ဍိတရာမကျောင်းက မြန်မာမိသားစုဝင်တွေစုပြီး တော်ဝင်အမျိုးသားဥယျာဉ်ထဲ
ပျော်ပွဲစားထွက်ကြတဲ့နေ့မှာ အစ်မတို့မိသားစုနဲ့အတူတူ လိုက်ပါဆင်နွှဲခွင့်ရခဲ့တာ ဇွန့်အတွက်
အမှတ်တရပါပဲ။ အစ်မတို့အတွက်တော့ ရေလယ်ခေါင်မှာ တက်တစ်ချောင်းနဲ့ တ၀ဲလည်လည်ဖြစ်နေတဲ့
ဇွန့်ကို ပိုအမှတ်ရနေမယ်လို့ ထင်ပါတယ်။း) တစ်သက်နဲ့တစ်ကိုယ် လှေတစ်ခါမှမလှော်ဘူးတဲ့ဇွန်က
ကမ္ဘာ့ဒုတိယသက်တမ်းအရင့်ဆုံး အမျိုးသားပန်းခြံရဲ့ ချောင်းလေးထက်က ကနူးလှေဦးပိုင်းမှာထိုင်ပြီး
ကြိုးစားလှော်ခတ်ပေမယ့် ရေလယ်ခေါင်ကနေ တော်တော်နဲ့ ကမ်းမကပ်၊ ပန်းမ၀င်နိုင်ခဲ့တဲ့အဖြစ်ကို
ပြန်တွေးမိတိုင်း ရယ်နေရပါတယ်။ ဇွန်ကတော့ ဖြစ်လိုက်ရင် အရာရာနဲ့အကြောင်းကြောင်းပါပဲ။
:D
ဇွန်မြန်မာပြည်ပြန်ရောက်ခဲ့တဲ့ မတ်လနောက်ပိုင်းကစလို့
တွေ့ဆုံမိတဲ့ ဘလော့ဂါတစ်ယောက်ပဲ ရှိပါသေးတယ်။ မြန်မာစာကို နှံ့နှံ့စပ်စပ်ကျွမ်းကျင်ပြီး
စာတိုပေစ ကဗျာလေးတွေ ထိထိမိမိ ရေးဖွဲ့တတ်တဲ့ မမေလို့ခေါ်တဲ့ အစ်မမေဓာဝီပါ။ မမေနဲ့ဇွန်တို့အိမ်က
နီးပါတယ်။ ကားနဲ့ဆို ပွိုင့်မမိရင် ငါးမိနစ်၊ ပွိုင့်မိရင်ဆယ်မိနစ်အတွင်းရောက်နိုင်တဲ့
အကွာအဝေးမှာရှိပြီး လမ်းလျှောက်ရင်တော့ မိနစ်နှစ်ဆယ်အစိတ်လောက်မှာ ရှိပါတယ်။ မမေက သူ့ဘလော့ဂ်ထိပ်စီးမှာ
တွေ့ရတဲ့ စာသားလေးလိုပဲ အမှန်တရားနဲ့ ပတ်သက်လာရင် မဟုတ်မခံစိတ်အပြည့်နဲ့ တုံ့ပြန်ခေါင်းမော့ပြီး
ရှေ့ကိုရဲရဲချီတက်နေသူနဲ့တူပါတယ်။ တိုက်တိုက်ဆိုင်ဆိုင် မမေကလည်း လသာ၂ကျောင်းသူဟောင်းတစ်ယောက်ဖြစ်တယ်ဆိုတာ
အဲဒီ့နေ့မှာ သိလိုက်ရပါတယ်။ မမေကိုယ်တိုင်ဦးစီးသင်ကြားပေးနေတဲ့ May International
School မှာ မြန်မာစာနဲ့ မြန်မာ့သမိုင်းကို သင်ရိုးထဲမှာ ထည့်ထားတဲ့အကြောင်း နားထောင်လိုက်ရတော့
အစ်မကို ခင်မင်စိတ်ထက်ပိုတဲ့ လေးစားစိတ်ပါ ဖြစ်ရပါတယ်။ သူရောကိုယ်ပါ အချိန်ရှားပါးသူတွေ
ဖြစ်ကြပေမယ့် တွေ့တွေ့ချင်း နှုတ်ဆက်ရာကနေ စကားတွေပြောဖြစ်လိုက်တာ တစ်နာရီနီးပါး ကြာသွားတဲ့အထိပါပဲ။
အဲ့ဒီနောက်ပိုင်း ထပ်မတွေ့ဖြစ်ကြပေမယ့် စိတ်ထဲမှာ သတိတရ ရှိနေပါတယ်။
တကယ်လို့များ ရန်ကုန်ပြန်ရောက်နေတဲ့
ဇွန်သာ တီတင့်အိမ်မှာ မုန့်လုပ်ကျွေးလို့ ဖိတ်ခေါ်တိုင်း တစ်ကြိမ်မဟုတ်တစ်ကြိမ် သွားဖြစ်ခဲ့ရင်
တခြားဘလော့ဂါတွေနဲ့ တွေ့ဆုံရင်းနှီးခွင့်ရမယ်လို့ ထင်ပါတယ်။ ဒါပေမယ့် အိမ်အလုပ်တစ်ဖက်၊
လူမမာတစ်ဖက်နဲ့ အချိန်ရှားပါးတဲ့ဇွန်တစ်ယောက် တီတင့်ဆီမလာနိုင်တာကို နားလည်ခွင့်လွှတ်ပေးနိုင်လိမ့်မယ်လို့
မျှော်လင့်မိပါတယ်။
Blog
Blog ဆိုတဲ့အသံကြားလိုက်ရင် အလိုလိုနားစွင့်ပြီးသား
ဖြစ်နေတာ ဘလော့ဂါတစ်ယောက်ရဲ့ ပုံမှန်သဘာဝပဲလို့ထင်ပါတယ်။ ဆစ်ဒနီတက္ကသိုလ်ရဲ့ ကျောင်းသားသစ်တွေကို
မြို့ရဲ့အထင်ကရနေရာတွေဆီ အမှတ်တရ လိုက်ပို့ပေးတဲ့ခရီးစဉ်မှာ ဥရောပတိုက်က ကျောင်းသူလေးတစ်ယောက်က
သူ့ဘလော့ဂ်အကြောင်းပြောနေတာကို ကြားလိုက်ရတာနဲ့ ဇွန်ရဲ့အကြားအာရုံတွေက သူ့စကားသံဆီ
ချက်ခြင်းဆိုသလို ရောက်ရှိသွားခဲ့ပါတယ်။ ဘေးက အဖော်ကောင်လေးနှစ်ယောက်ကို သူရဲ့ ဥရောပသံဝဲ၀ဲလေးလေးနဲ့
ပြောသမျှစကားလုံးတွေ အကုန်နားမလည်ခဲ့ပေမယ့် သူ့ဘလော့ဂ်မှာ စာဖတ်သူတွေ များလာကြောင်း၊
အင်္ဂလိပ်လိုပါရေးဖို့ တောင်းဆိုသူတွေ ရှိလာတဲ့အတွက် အခုခါမှာ ဘာသာနှစ်မျိုးနဲ့ ရေးနေရလို့
သူ့အတွက် အချိန်အရမ်းပေးရကြောင်းတွေကိုတော့ ဇွန်နားလည်လိုက်ပါတယ်။ ပို့စ်အပုဒ်တိုင်းကို
မိခင်ဘာသာရော၊ အင်္ဂလိပ်ဘာသာနဲ့ပါ အချိန်ပေးပြီး ရေးနေတဲ့ ကျောင်းတစ်ဖက်နဲ့သူ့ကိုတော့
စိတ်ထဲက ချီးကျူးမိပါတယ်။ ဒီခေါင်းစဉ်အောက်မှာ ဇွန် မျှဝေပေးချင်တဲ့ဘလော့ဂ်အကြောင်းက
သူနဲ့ မပတ်သက်ပါဘူး။ ဘလော့ဂ်နဲ့ပတ်သက်လာရင် အလိုလိုနိုးကြားတတ်တဲ့ ဇွန့်စိတ်အာရုံအကြောင်း
ဘလော့ဂ်ဒေးမှာ ပြောပြချင်ရုံသက်သက်ပါ။
ဇွန်မျှဝေမိတ်ဆက်ပေးချင်တဲ့ ဘလော့ဂ်တစ်ခုက
တခြားမဟုတ်ပါဘူး။ အလွန်တရာမှ ထက်မြက်ထူးချွန်တဲ့ စုံထောက်အကြံပေး Mr. Sherlock
Holmes ရဲ့ မိတ်ဆွေကြီး Dr. John Watson ရဲ့ Personal Blog ပဲ ဖြစ်ပါတယ်။ တကယ်တော့
နှစ်ဆယ့်တစ်ရာစု အွန်လိုင်းအိုင်တီခေတ်မှာ ဖန်တီးတင်ဆက်ကြတဲ့ ရုပ်ရှင်၊ ဗွီဒီယို၊ တီဗီဇာတ်လမ်းတွေမှာ
blog တွေ၊ forum တွေ၊ လူမှုကွန်ယက်တွေရဲ့ ပါဝင်ပတ်သက်မှုက ထွေထူးပြီး အံ့သြစရာ ကောင်းမနေပါဘူး။
ဟောလီးဝုဒ်က ရိုက်ကူးခဲ့တဲ့ Julie & Julia ဖြစ်ရပ်မှန် ဇာတ်ကားထဲက ဘလော့ဂါဂျူလီရဲ့ဘ၀တစ်စိတ်တစ်ပိုင်းကတော့
ဇွန်တို့လို ဘလော့ဂါတွေရဲ့ စိတ်ဝင်စားခြင်း ခံခဲ့ရပါတယ်။ ဒီကားနဲ့ပတ်သက်ပြီး
review ရေးခဲ့ဖူးတဲ့ ညီမရွှေပြည်သူကို သတိရမိပါတယ်။ ပုံမှန်အားဖြင့် ရုပ်ရှင်နဲ့အခြားသော
တီဗွီဇာတ်လမ်းတွဲတိုင်းလိုလို ဇာတ်ကားထဲမှာပါတဲ့ ဘလော့ဂ်တွေ၊ ၀က်ဘ်ဆိုဒ်တွေကို ဇာတ်ကြောင်းအရ
ဖန်တီးခဲ့တာမျိုးသာဖြစ်ပြီး၊ တကယ့်လက်တွေ့အပြင်မှာ ရှိမနေကြပါဘူး။ (ဂျီူလီနဲ့ဂျူလီယာဇာတ်ကားလို
အမှန်တကယ်အပြင်မှာရှိခဲ့၊ ဖြစ်ပျက်ခဲ့တဲ့ အကြောင်းရာကို ပြန်ရိုက်တဲ့ဇာတ်ကားမျိုးကလွဲလို့ပေါ့)
ဒါပေမယ့် BBC က ရိုက်ကူးတင်ဆက်ပြသတဲ့
နိုင်ငံတကာမှာ လူသိများကျော်ကြားနေတဲ့ ရှားလော့ခ်ဟုမ်း ဇာတ်လမ်းတွဲထဲက ဆာဂျင်ဂျွန်ဝထ်ဆင်ရဲ့
ဘလော့ဂ်ဟာ အပြင်မှာ တကယ်ပဲ ရှိနေပါတယ်။ ဇာတ်လမ်းတွဲထဲမှာ ဂျွန်က သူ့ကိုယ်ပိုင်ဘလော့ဂ်ပေါ်မှာ
ရှားလော့ခ်နဲ့တွေ့ဆုံပုံ၊ သူ့အခန်းဖော်ရဲ့ ထူးခြားတဲ့ အပြုအမှုနဲ့လုပ်ရပ်တွေကြောင့်
အူကြောင်ကြောင်ဖြစ်ရတဲ့ သူ့ခံစားချက်၊ နောက်ပြီး သူပါဝင်စုံစမ်းခဲ့တဲ့ ရှားလော့ခ်ရဲ့
အမှုတွဲအကြောင်းတွေကို ရေးလေ့ရှိပါတယ်။ ရှားလော့ခ်ကိုယ်တိုင်ကတော့ အမှုနဲ့ပတ်သက်တဲ့ သူ့တွေးခေါ်ပုံအချို့နဲ့
ဆင်ခြင်ကောက်ချက်ချပုံတွေကို သူ့ဖိုရမ်ဖြစ်တဲ့ The Science of Deduction မှာ ၀င်ရေးတတ်ပါတယ်။ တကယ်ဆို ခေတ်နဲ့လျော်ညီအောင်
ပြင်ဆင်ဇာတ်ညွှန်းခွဲပြီး ရိုက်တာမို့ ဒီဘလော့ဂ်တွေ၊ ဖိုရမ်တွေဟာ အပြင်မှာမရှိလည်း ပြဿနာမရှိပါဘူး။
ဒါပေမယ့် သဏ္ဍာန်လုပ်သရုပ်တူဆိုတာမျိုးဖြစ်အောင် ဘီဘီစီက ဒီဝက်ဘ်ဆိုဒ်တွေကို အမှန်တကယ်
ပြုလုပ်ဖန်တီးပေးထားတာကို မြင်လိုက်ရတော့ အနုပညာနဲ့ပတ်သက်ပြီး လေးလေးနက်နက်ထားရှိတဲ့
သူတို့ရဲ့လုပ်ဆောင်ချက်ကို လေးစားအသိအမှတ်ပြုမိပါတယ်။ ဂျွန်နဲ့ရှားလော့ခ်တို့ရဲ့ ၀က်ဘ်ဆိုဒ်အပြင်
ရှားလော့ခ်ကို တစ်ဖက်သက်နှစ်သက်စွဲလန်းနေတဲ့ မော်လီရဲ့ဘလော့ဂ်ဒိုင်ယာရီနဲ့ အမှုတွဲတစ်ခုမှာပါဝင်တဲ့
အနုပညာရှင်ကော်နီပရင့်စ်ရဲ့ ၀က်ဘ်ဆိုဒ်ကလည်း တည်ရှိနေတာပါ။
စာရေးဆရာကြီးအာသာကိုနင်ဒွိုင်းလ်ရဲ့
စာပေအရေးအသားကောင်းမွန်ကျွမ်းကျင်မှုကြောင့် ရှားလော့ခ်ဟုမ်း တကယ်ရှိတယ်လို့ စာဖတ်ပရိသတ်များ
ထင်မှတ်မှားခဲ့ဖူးပါတယ်။ တကယ်လို့များ အခုခေတ်မှာ ရှားလော့ဟုမ်းကို မဖတ်ဖူးခဲ့၊ မသိခဲ့တဲ့
တစ်စုံတစ်ယောက်ဟာ ဂျွန့်ဘလော့ဂ်ကို ဖတ်မိပြီး တကယ်လို့ ထင်သွားနိုင်ပါတယ်။ စာဖတ်သူများအတွက်
ဂျွန်ရဲ့ဘလော့ဂ်ကို ပိုပြီး အသက်ဝင်၊ အဟုတ်ထင်မှတ်စေတာကတော့ ပို့စ်တစ်ပုဒ်ပြီးတိုင်း
အောက်က ပေးသွားတဲ့ မှတ်ချက်တွေ၊ တုံ့ပြန်မှုတွေပါ။ ဇာတ်လမ်းထဲမှာပါဝင်ကြတဲ့ အထင်ကရ ဇာတ်ကောင်တွေက
ဂျွန့်ရဲ့ပို့စ်အောက်မှာ ရေးသွားကြတာကိုကြည့်ပြီး ပြုံးရပါတယ်။ ရှားလော့ခ်ကတော့ ပင်တိုင်ကော်မန့်ပေးသူ
တစ်ယောက်ပါ။ ဟယ်ရီဝထ်ဆင်၊ မစ္စဟတ်ဒ်ဆင်၊ မော်လီတို့အပြင် ဂျွန့်ရဲ့ သတို့သမီးဖြစ်လာတဲ့
မေရီတို့ အပြန်အလှန် တစ်ယောက်တစ်ပေါက် ၀င်ရောက်ရေးသားကြ၊ ရန်ဖြစ်စကားနိုင်လုနေကြတာကို
ဖတ်ရတာ တကယ့်ကို အသက်ဝင်လှပါတယ်။ ရှားလော့ခ်ဇာတ်လမ်းတွဲ အစအဆုံးကြည့်ပြီးသူတစ်ယောက်အတွက်
ဂျွန့်ရဲ့ပို့စ်တိုင်းကို ပြန်ဖတ်ချင်အောင် ဆွဲဆောင်နိုင်တဲ့ ဘလော့ဂ်တစ်ခုလို့ ဇွန်ညွှန်းချင်ပါတယ်။
ဒါကြောင့် ဇွန့်ရဲ့ ဘလော့ဂါသူငယ်ချင်းမိတ်ဆွေပဲဖြစ်ဖြစ်၊ စာဖတ်သူမောင်နှမတွေပဲဖြစ်ဖြစ်
ဘီဘီစီရှားလော့ခ်ရဲ့ ပရိတ်သတ်တွေ ဖြစ်ခဲ့မယ်ဆိုရင် ဇွန်အောက်မှာပေးထားတဲ့လင့်ခ်ကို
တစ်ခေါက်လောက်ပဲဖြစ်ဖြစ် သွားရောက်ကြည့်စေချင်ပါတယ်။
ဂျွန်ဝထ်ဆင်ရဲ့ ဘလော့ဂ်တကယ်ရှိကြောင်း
ဇွန့်မောင်လေးက ရှာဖွေတွေ့ရှိပြီးပြောပြလာချိန်မှာ ဇွန်အရမ်း စိတ်ဝင်စားသွားခဲ့ပါတယ်။
ကိုယ်အရမ်းနှစ်သက်တဲ့ ရှားလော့ခ်ဟုမ်းဇာတ်လမ်းတွဲထဲက ဘလော့ဂ်တစ်ခုက အပြင်မှာရှိကြောင်း
တွေ့လိုက်ရချိန်မှာ ဘလော့ဂါပီပီ ကျေနပ်သွားပါတယ်။ ခုနောက်ပိုင်း ဘလော့ဂ်မှာစာရေးကျဲသွားပေမယ့်
ဘလော့ဂ်ဆိုတဲ့ ဝေါဟာရတစ်ခုနဲ့ ဆက်နွယ်ပြီး ဖြစ်ပေါ်လာတဲ့ ဖန်တီးရေးသားမှုတွေကတော့ ဇွန့်အာရုံနဲ့အတွေးအမြင်ကို
လွှမ်းမိုးနိုင်စွမ်း ရှိနေဆဲဆိုတာ သိလာရပါတယ်။ ဂျွန့်ဝက်ဘ်ဆိုဒ်နဲ့ ရှားလော့ခ်ရဲ့ဖိုရမ်အကြောင်း
သတင်းပေးခဲ့တဲ့ မောင်လေးကို ကျေးဇူးတင်ပါတယ်။
Sherlock
တဆက်တည်းမှာပဲ ရှားလော့ခ်ဟုမ်းနဲ့ ပတ်သက်ပြီး
ရှားလော့ခ်ဟုမ်း ပရိသတ်များကို ပြောပြဝေမျှချင်တဲ့ အကြောင်းရှိလာပါတယ်။ အင်္ဂလိပ်စာရေးဆရာကြီး
ဆာအာသာကိုနင်ဒွိုင်းလ်ရဲ့ စုံထောက်ကြီးရှားလော့ခ်ဟုမ်းကို စာဖတ်ပရိတ်သတ်အားလုံးလိုလို
ရင်းနှီးပြီးသား ဖြစ်ကြပါတယ်။ ရှားလော့ခ်ဟုမ်းကို တိုက်ရိုက်အကျွမ်းတ၀င်မရှိခဲ့ရင်တောင်
ဆရာကြီး ရွှေဥဒေါင်းရဲ့ စုံထောက်မောင်/ဦးစံရှားဇာတ်လမ်းတွေကတဆင့် သိခွင့်ရခဲ့ကြမှာပါ။
၁၉၀၀ ပြည့်လွန်နှစ်များဆီက ရှားလော့ခ်ဟုမ်းစုံထောက်ဇာတ်လမ်းတွဲအားလုံးကို ဇာတ်ကောင်၊
ဇာတ်လမ်း၊ အခင်းအကျင်း၊ လူနေရာအားလုံး ဆီလျော်အောင် မြန်မာမှုပြီး ဘာသာပြန်ဆို ရေးသားခဲ့တဲ့
ဆရာကြီးရွှေဥဒေါင်းကို အရမ်းပဲလေးစားမိပါတယ်။
ငယ်ငယ်ကတော့ စာအနေနဲ့ ရှားလော့ခ်ကိုရော
ဦးစံရှားကိုပါ ဟိုတစ်ပုဒ်၊ ဒီတစ်ပုဒ် ရင်းနှီးဖူးပါတယ်။ ရှားလော့ခ်ဟုမ်းရုပ်ရှင်ကိုတော့
ဆယ်တန်းပြီးခါစ ဗြိတိသျှကောင်စီစာကြည့်တိုက်ရဲ့ အသင်းဝင်ဖြစ်လာပြီးနောက်မှာမှ ပထမဆုံးစကြည့်ဖူးခဲ့ပါတယ်။
မှတ်မှတ်ရရ မင်းသား Basil
Rathbone ပါဝင်သရုပ်ဆောင်တဲ့ The Hound of Baskervilles (မြန်မာပြန်-ဗာစကေးဗီအင်းခွေးကြီး) ကားဖြစ်ပါတယ်။
စာအုပ်ဖတ်ဖူးပြီး ဇာတ်လမ်းသိနေလို့ စိတ်ဝင်စားစရာကောင်းမယ်အထင်နဲ့ ၀မ်းသာအားရ ကြည့်ခဲ့ပေမယ့်
အဖြူအမည်းကားဖြစ်တဲ့အပြင် ဇာတ်လမ်းရိုက်ကူးတင်ဆက်ပုံက လေးတွဲတွဲဖြစ်နေလို့ ဇွန့်အတွက်
အရမ်းပျင်းစရာကောင်းခဲ့ပါတယ်။ အဲ့ဒီနောက်ပိုင်း အဖြူအမည်း ရှားလော့ခ်ဇာတ်လမ်းတွဲတွေ
ထပ်ငှားမကြည့်ဖြစ်တော့ပါဘူး။ ရှားလော့ခ်နဲ့အဆက်ပြတ်သွားခဲ့တာ ၂၀၀၉ခုနှစ်ရောက်တဲ့အထိ
ဆိုပါတော့။ မက်ဒေါနားရဲ့ခင်ပွန်းဟောင်း ဂိုင်းရီချီရိုက်ကူးခဲ့တဲ့ ရောဘတ်ဒေါင်းနီဂျူနီယာနဲ့
ဂျုဒ်လောတို့ ပါဝင်သရုပ်ဆောင်ထားတဲ့ ခပ်သွက်သွက်ရိုက်ချက်များနဲ့ ခေတ်သစ်ရှားလော့ခ်ဟုမ်းရုပ်ရှင်ကို
သဘောကျခဲ့ပါတယ်။ ၂၀၁၁ မှာ ရုံတင်ခဲ့တဲ့ သူ့နောက်ဆက်တွဲကားကိုလည်း သွားကြည့်ခဲ့ပါတယ်။
ခေတ်အဆက်အဆက် ရှားလော့ခ်ဟုမ်းရုပ်ရှင်နဲ့
ရုပ်သံဇာတ်လမ်းတွဲတွေကို အမျိုးမျိုးအဖုံဖုံ ရိုက်ကူးပြသခဲ့ကြပေမယ့် ၂၀၁၀ခုနှစ်မှာ
ဘီဘီစီက စတင်ထုတ်လွှင့်ခဲ့တဲ့ တစ်နာရီခွဲစာ ရှားလော့ခ်ဟုမ်းမီနီစီးရီးသုံးပုဒ်ဟာ အရင့်အရင်ရိုက်ကူးခဲ့သမျှ
ရုပ်ရှင်ဇာတ်လမ်းတွဲ အားလုံးကို ကျော်ဖြတ်ပြီး လူကြိုက်အများဆုံးဖြစ်သွားခဲ့ပါတယ်။
အဲဒီထဲက ရှားလော့ခ်ဟုမ်းအဖြစ် သရုပ်ဆောင်တဲ့ မင်းသား Benedit Cumberbatch ရော၊ ဂျွန်ဝထ်ဆင်အဖြစ်
သရုပ်ဆောင်တဲ့ Martin Freeman ပါ ကျော်ကြားသွားခဲ့လို့ နောက်ပိုင်း ဟောလီးဝုဒ်ဇာတ်ကားကြီးတွေမှာ
ပါဝင်သရုပ်ဆောင်ဖို့ ကမ်းလှမ်းခြင်း ခံရပါတော့တယ်။ ဇာတ်လမ်း၊ ဇာတ်ကွက်၊ ဇာတ်ကောင်နဲ့
လန်ဒန်နောက်ခံ နေရာအခင်းအကျင်း အပြင်အဆင်အားလုံးအပြင် အမှုတွဲတွေကိုလည်း ခေတ်နဲ့အညီပြုပြင်ရေးသား
ဇာတ်ညွှန်းဆွဲထားလို့ အရမ်းကြည့်ကောင်းတဲ့ ဇာတ်လမ်းတွဲတစ်ခု ဖြစ်သွားတယ်လို့ ဇွန်မြင်ပါတယ်။
ပထမဆုံးစီးရီးထွက်ပြီး တစ်နှစ်ခွဲနှစ်နှစ်လောက်ကြာမှ
Channel 5 က ထုတ်လွှင့်တဲ့ ဘီဘီစီရှားလော့ခ်ကို ဇွန်စကြည့်ဖူးတာပါ။ နောက်ထပ် စီးရီးနှစ်ခုကိုတော့
ဒီနှစ်မြန်မာပြည်ပြန်ရောက်ပြီးမှ အစအဆုံး ကြည့်ဖြစ်သွားပါတယ်။ စီးရီးတစ်ခုကြည့်ဖို့
ပရိတ်သတ်တွေက တစ်နှစ်ခွဲနီးပါးကြာအောင် စောင့်ရပါတယ်။ ပြီးတော့ ဇာတ်လမ်းတွဲက တစ်နာရီခွဲစာ
သုံးပုဒ်ပဲပါတာမို့ ကြည့်ရတာ မ၀ပါဘူး။ ဒါပေမယ့် နောက်ထပ်စီးရီးအသစ်မလာခင်မှာ ရှားလော့ခ်အလွမ်းပြေ
အစားထိုးကြည့်စရာ ကားတစ်ကား ရှိလာပါတယ်။ အဲဒါကတော့ ၂၀၁၂ခုနှစ်မှာ အမေရိကန်ရုပ်သံ
CBS ကထုတ်လွှင့်ခဲ့တဲ့ အမေရိကန်ဗားရှင်းရှားလော့ခ်ဟုမ်းစီးရီးကြောင့်ပါ။ နယူးယောက်မှာ
အခြေတည်ထားတဲ့ Elementary ဇာတ်လမ်းတွဲမှာ ပါဝင်သရုပ်ဆောင်ထားတဲ့ ရှားလော့ခ်ဟုမ်းက ဗြိတိသျှမင်းသား
Jonny Lee Miller ဖြစ်ပါတယ်။ Miller ပါဝင်သရုပ်ဆောင်ခဲ့တဲ့ Hackers ကားကို ၉၇၊ ၉၈လောက်မှာ
ကြည့်ဖူးလို့ သူ့ကိုသိနေခဲ့ပါတယ်။ အဲဒီကားမှာပဲ အင်ဂျလီနာဂျိုလီနဲ့ ဆယ်ကျော်သက် Hackers
များအဖြစ် အတူသရုပ်ဆောင်ရင်း မေတ္တာမျှသွားပြီး လက်ထပ်ဖြစ်ခဲ့လို့ ဂျိုလီရဲ့ ပထမဆုံးခင်ပွန်းလို့ဆိုရင်
မမှားပါဘူး။
BBC Sherlock နဲ့ Elementary ကို နှိုင်းယှဉ်ကြည့်လို့တော့
မရနိုင်ပါဘူး။ သူ့အရသာနဲ့သူ တစ်မျိုးစီတော့ ကောင်းနေတာပါပဲ။ နှစ်ကားလုံးကို ကြည့်ဖူးတဲ့သူအများစုက
ဗြိတိသျှဇာတ်လမ်းတွဲကို ပိုကြိုက်ကြပြီး၊ တစ်ချို့ပရိသတ်ကတော့ အမေရိကန်ဗာရှင်းကို ပိုနှစ်သက်တယ်လို့
ဆိုကြပါတယ်။ ဇွန့်အတွက်တော့ ဗြိတိသျှရှားလော့ခ်ဟုမ်းမင်းသားက ပိုဆွဲဆောင်မှုရှိပြီး၊
အမေရိကန်ဇာတ်လမ်းမှာတော့ ဆာဂျင်ဂျူန်းဝထ်ဆင်အဖြစ် သရုပ်ဆောင်တဲ့ မင်းသမီးလူစီလျူးက
ထူးခြားတဲ့ရသကို ပေးပါတယ်။ ဇာတ်လမ်းဇာတ်ကွက်အရ Elementary က twist & turn တွေ ပိုများပါတယ်။
Sherlock Holmes, CSI, Criminal Minds နဲ့ The Mentalist လို ဇာတ်လမ်းတွဲများကို နှစ်ခြိုက်ကြတဲ့
ပရိသတ်တွေဟာ Elementary ကိုပါ ကြိုက်နှစ်သက်လိမ့်မယ်လို့ ဇွန်ယုံကြည်ပါတယ်။ ဒါကြောင့်
စာဖတ်သူမောင်နှမတွေထဲက ရှားလော့ခ်ပရိသတ်များရှိခဲ့လို့ Elementary ကို မကြည့်ရသေးသူများရှိရင်
ကြည့်ရအောင် ဇွန်က ပြန်လည်ညွှန်းဆို ဝေမျှခြင်းဖြစ်ပါတယ်။ Season တစ်ခုစီမှာ ၄၅မိနစ်စာ
၂၄ ပုဒ်ပါတဲ့အတွက် တစ်နေ့တစ်ပုဒ်နှုန်းနဲ့ တစ်လလောက် အေးအေးဆေးဆေး ကြည့်နိုင်ပါတယ်။
ဇွန်ကတော့ Season 1 ဇာတ်လမ်းတွဲအားလုံး ကြည့်ပြီးသွားပါပြီ။ Season 2 ကိုတော့ နောက်တစ်လလောက်နေမှ
ဆက်ကြည့်ဖို့ ဆုံးဖြတ်ထားပါတယ်။
ဒီနှစ် Blog Day အတွက် တွေ့ဆုံခဲ့ရတဲ့
Blogger များအကြောင်းရော၊ John Watson ရဲ့ Blog အကြောင်းအပြင် Sherlock Holmes အကြောင်းပါ
ဆက်စပ်ပြီး တစ်ပုဒ်ထဲမှာ ရေးလိုက်ရလို့ ဇွန်ကျေနပ်သွားပါပြီ။ စာရှည်သွားရင်တော့ ခွင့်လွှတ်ပြီး
ဖတ်ပေးကြပါလို့။ အားလုံးပဲ Happy Blog Day ပါ။ :)
ဇွန်မိုးစက်
၃၁-၈-၂၀၁၄
နံနက် ၁၂နာရီ ၃၅မိနစ်
ဘလော့ဒေး အမှတ်တရလေးကနေ မသိသေးတဲ့ ဗဟုသုတတွေ အများကြီး ရသွားတယ် ဇွန်ရေ.. အမှန်က တီတင့်က ပြန်တောင်းပန်ရမှာပါ ဇွန်က လူမမာကြည့်နေရတဲ့သူလေ ဆုံဖြစ်အောင်ဆုံကြမယ်... ဖတ်ခွင့်ရလို့ ကျေးဇူးတင်ပါတယ် ဇွန်လေးရေ ...
Miss you too sis. I also remember that day, we all enjoyed the event. When will you come back? Please let me know!!
Happy Blog Day Dear !
ဇွန်က ရှားလော့ခ်ဟုမ်းနဲ့ ပတ်သက်ရင် ဂဃနဏ သိနေတာပဲကိုး..၊ ဘလော့ဂ်ကို စိတ်ဝင်တစား ရှိနေဆဲလို့ သိရတာ ဝမ်းသာရသလို ဘလော့ဂ်ဒေးအတွက် ပို့စ်လေးကလည်း အမှတ်တရပါပဲလေ…။
တောင်းပန်စရာ မလိုပါဘူး တီတင့်ရေ။ တီတင့်ဖိတ်တိုင်း မလာဖြစ်တာက ဇွန်ပါ။ နောက်တစ်ခါဆိုရင်တော့ ကြိုးစားပြီး ဆုံနိုင်အောင် ကြိုးစားပါ့မယ်။း)
ှSure, sis T T Sweet. I will let you know if I happen to come back to Syd. :)
Same to you par, dear Nyo! :)
အစ်ကိုညီလင်း... ရှားလော့ခ်ဟုမ်းနဲ့ပတ်သက်လာရင်... 'ဒါ့ထက်တောင်ပိုသေး' လို့ ဇွန်က ပြန်ပြောချင်တာ... အဟား...ဟား...ဟား။ :D
Happy Blog Day ကိုနုတ်ဆက်ဖို့ရောက်လာပြီးမှ
အများကြီးသိခဲပရလို့ ကျေးဇူးပါမိုးစက်ရေ
သတိတရနဲ့ လာနှုတ်ဆက်တဲ့ အစ်မစံပယ်ကို ကျေးဇူတင်ပါတယ်။ Happy (belated) Blog Day to you too! :)
တော်တော်ကြီးနောက်ကျပြီးမှ ဟက်ပီးဘလော့ဒေးပါ မဇွန်