ကျွန်တော့်ကို အမေက နွေဦး (ကုမ်ရာသီ) မှာ မွေးခဲ့လို့လား မပြောတတ်ပါ။ နွေဦးကိုရောက်တိုင်း ခံစားမှု တစ်မျိုး လွင့်လာတတ်ကာ အလွန်စွဲလန်းသော အာရုံဖြင့် ရှိနေတတ်ပါသည်။ နွေဦးဝင်ပြီဆိုသည်နှင့် တိုက်မြဲ မြောက်လေကလေး ဖယ်ဆုတ်ရာက တောင်လေကလေး သုန်လာတတ်သည်။ အမေက ဘာလိုလိုနဲ့ တောင်လေကလေးတောင် သွေးပြန်ပါပကောလို့ မှတ်မှတ်ရရ ပြောတတ်မြဲလည်း ဖြစ်သည်။ တောင်လေကလေး ပြက်သည်နှင့် နွေနံ့တွေ ကြိုင်ကြိုင်လှောက်လာတော့သည်။ နွေ၏ရနံ့သည် ပန်းရနံ့တွေလည်းမဟုတ်၊ ဖုန်ခိုး မီးနံ့လည်းမဟုတ်။ မြေခိုးမြေငွေ့တွေ အူလာလို့လည်းမဟုတ်။ နွေဦးရာသီကပဲ သယ်ဆောင်လာသည့် သဘာဝရနံ့ဖြစ်သည်။ နွေလေကပဲ သစ်ရွက်ဟောင်းတွေ ခြွေချပေးသည်။ ရွက်ခြွေလေ တစ်ချက်သုတ်လိုက်သည်နှင့် ရွက်ဟောင်းတွေ ဝေ့ဝေ့၀ဲဝဲ ကြွေကြရသည်။ ကျွန်တော်တို့ငယ်ငယ်က သစ်ရွက်ကြွေဖမ်းတမ်း ကစားကြသည်။ မှို့သီးလဲသီးကွဲတွေက လွင့်ပါလာတတ်ကြသော လဲစမှို့စ လူးလူးလိမ့်လိမ့်ကလေးတွေကို လိုက်ဖမ်းရတာကလည်း ပျော်စရာ ဖြစ်ရသည်။ နွေဦးမှာ မွှေ့တတ်ဝှေ့တတ်သော လေပွေခေါ်ကြသည့် “လေပူကတော့” ကို ကျွန်တော် ကြောက်တတ်သည်ဟု အမေပြောဖူးသည်။ “လေပူကတော့” ကြီးတွေက အချိန်အခါမရွေး၊ နေရာမရွေး လေပူချင်း ဆိုင်မိလျှင် ဖုန်နှင့် အမှိုက်တွေကို ဆွဲတင်သွားတတ်တာကို ကလေးပီပီ ကြောက်ခဲ့တာဖြစ်လိမ့်မည်။ ကျွန်တော်တို့ခြံထဲက မာလကာပင်၊ သြဇာပင်၊ ဂွေးသီးပင်၊ သလဲပင် တွေကလည်း အရွက်တွေမကျန်အောင် “ခါ” တတ်သည်။ ညအခါ ကောင်းကင်ရောင်နောက်ခံမှာ အရိုးစုကြီးတွေ ရပ်နေကြသည်နှင့်တူသည်။

စည်းရိုးစပ်မှာရှိကြသော ငုပင်နှင့်ပေါက်ပင်ကတော့ တစ်မျိုးလှကြသည်။ ငုဝါရောင်က ပိတောက်နှင့်မတူ။ ရွှင်သော အ၀ါရောင်ဖြစ်သည်။ ငုတစ်ပင်လုံး ခဲနေအောင် ပွင့်သည့်အတွက် မြင်ရသည်ပင် ခူးချင့်စဖွယ်။ ပေါက်ကတော့ အပင်ကြီးမျိုးဖြစ်သည်။ ပွင့်စမှာ နီနီမြန်းမြန်း၊ တစ်ရက်နှစ်ရက်ကြာတော့ လိမ္မော်ရောင်ဘက်ကူးကာ တစ်သွေး လှနေတော့သည်။ နွေဦးမှာ အမှတ်တရအရှိဆုံးကတော့ ဥသြတွန်သံဖြစ်သည်။ ဥသြတွန်သံကို ခံစားမိရခြင်းမှာလည်း အဓိပ္ပာယ်ရှိသည်။ ဥသြတွေ တွန်ပြီဆိုလျှင် အဖေရောက်လာတော့မည်။ ကျွန်တော် လူမှန်းသိစကတည်းက အဖေက ရန်ကုန်မှာ အလုပ်လုပ်နေသည်။ ကျွန်တော်နှင့်အမေက ရွာမှာ။ တစ်နှစ်တစ်ခါ နွေကျောင်းပိတ်ချိန်မှာ အဖေ ရောက်လာတတ်သည်။ ဟိုတုန်းက သည်ခေတ်လို သွားရေးလာရေး လွယ်လှသည်မဟုတ်။ ရန်ကုန် ပြည် ဘတ်စ်ကား စီးရသည်။ ပြည်ရောက်တော့ တစ်ညအိပ်။ ပြည် ကူးတို့ သဘောင်္ကြီးတွေ စီးကာ သင်္ဘောပေါ်မှာ တစ်ညအိပ်။ သံကိုင်းဆိပ်ကိုရောက်မှ ဆင်းကာ မြင်းလှည်းနှင့် ကုန်းဇောင်းကို လာရသည်။ အဖေရောက်လာတော့ စစ်သုံးတာပေါ်လင် အိပ်ရာလိပ်ကြီးပါသည်။ တစ်လုံးချိုင့်ခေါ်သည့် ထမင်းချိုင့်ပါသည်။ အ၀တ်အစားတွေကတော့ အိပ်ရာလိပ်ထဲမှာ။ အဖေ့အကြောင်း ကျွန်တော်ရေးလျှင် သည်အရုပ်တွေ အရိပ်တွေ မပါလို့မရ။ မက်ဆိုပိုတေးမီးယား စစ်မြေပြင်က ပြန်လာသော ဂျမဒါတစ်ယောက်နှင့်တူသည်ဟု ကျွန်တော်ရေးဖူးသည်။ အဖေရောက်လာသည့်ရက်တွေက နွေဦး။ ဥသြတွန်တဲ့ လရာသီ။ နှစ်စဉ် ဥသြတွန်သံကြားလျှင် အမေက “မင်းအဖေ လာတော့မယ်” လို့ ပြောတတ်သည်။ အမေလည်း ဥသြတွန်သံကို မျှော်နေတာများလား။

ဥသြတွန်သံက ချိုမြိန်သော အလွမ်းဓာတ်ကလေး ပါသည်။ အလွမ်းဓာတ်ကဲသော သံချိုလို့လည်း ပြောနိုင်သည်။

ဥသြသံက နွေဦး၏ ဖွားဖက်တော်ဖြစ်သည်။

ရှင်အုံးညို၏ ဂါထာ ၆၀ ပျို့မှာ “ရဂုံတောဝယ်၊ ဥသြကျေးငှက်၊ ယှဉ်ဖက်မကွာ၊ ဟင်္သာပဲထွေး၊ သံလေးကျူးဆင့်၊ ကြွေးရင့်မညံ” လို့ ဖွဲ့သည်။ “ကြွေးရင့်မညံ” သည် မဆူမညံ နားချမ်းသာသော အသံကို ဆိုလိုပုံရသည်။ ကွမ်းရေတော်ကိုင် ဦးယာကတော့ ဥသြကို အလွမ်းဘက်ကို ကူးကာ ခံစားသည်။ သူ၏တပေါင်းလ ဘွဲ့တစ်ပုဒ်မှာ “မြိုင်ခွင်တစ်ကြော၊ ဥသြရင့်ကြွေး၊ ကျူးသံပေးလျက်၊ လွမ်းရေးဖြာဖြာ၊ ရွှေသည်းညှာလည်း၊ ကြွေရှာလုဖွယ်” လို့ ဖွဲ့သည်။ အသည်းကြွေမတတ် ခံစားရသော မြိုင်ဦးက ဥသြသံကို သူလည်း ခံစားပုံရသည်။

ဥရောပနွေဦးကို ကျွန်တော် ကြုံခဲ့ဖူးသည်။ သူတို့ နွေဦးကို သူတို့ကလည်း မျှော်မောတကြီး ရှိကြတာ သတိထားမိပါသည်။ သူတို့နွေဦးဆိုသော်လည်း သူတို့ပထ၀ီနှင့် အစပ်မတည့်လှသော ကျွန်တော့်အဖို့ နွေဦးလို့မထင်။ ပြင်သစ်နိုင်ငံ အနောက်ပိုင်းမှာ သမုဒ္ဒရာပိုင်းရာသီဥတုရှိသည်။ တောင်ပိုင်းမှာက မြေထဲပင်လယ်ရာသီဥတု။ အရှေ့နှင့် ဗဟိုပိုင်းမှာတော့ ကွန်တီနင်တယ် ရာသီဥတု ခေါ်ကြသည်။ ကုန်းမြေထုနှင့်ဆိုင်သော ရာသီဥတု ဖြစ်လိမ့်မည်။ မည်သို့ပင်ဖြစ်စေ သူတို့တစ်နိုင်ငံလုံး၏ နွေဦးသည် အေးမြ၍ ခြောက်သွေ့သော လေတွေ တိုက်နေတတ်သည်။ ဆီးနှင်းမိုး ရွာတတ်သော နွေဦးဖြစ်သည်။ မိုးနှင့် နှင်းကြွင်း၊ မြူနှင့် ဆောင်းနံ့ထုံသောရာသီကို နွေဦး ခေါ်နေကြသည်။ နွေဦးမှာမှ မြင်ရတတ်သော သစ်ရွက်တွေကတော့ အရောင်ဆန်းပါသည်။ ဒန်ရောင်၊ ဖန်ရောင်၊ သံမဏိရောင်တွေပင် ပါလိုက်သေးသည်။ ပါရီမှာပင် သဘာဝသစ်တော၊ မြို့လယ်ရပ်ကွက်အလိုက်သစ်တော၊ အမျိုးသားသစ်တော စသည်ဖြင့်ရှိသည်။ သဘာဝ သစ်တောများကို ပသာဒဖြစ်အောင် ပြုပြင်ထားသဖြင့် စိုက်ခင်းသစ်တော ထင်စရာရှိသော်လည်း တောကြီးဟေ၀န်မှန်း သိသာပါသည်။ ကျွန်တော် သတိထားမိသလောက်တော့ အောက်ချင်းသောင်းသောင်း၊ ဥဒေါင်းထိတ်ထိတ်၊ ကရ၀ိတ်သံသာ၊ ခါလည်းငေါ်ငေါ်၊ ငှက်တော်သဲသဲ၊ လင်းဆွဲသက်သက်၊ ဆက်ရက်လေးမျိုး၊ ကျေးရှစ်မျိုးနှင့် ချိုးမျိုးလေးတန်၊ သိန်းစွန် ခင်ပုပ်တို့ မြိုင်လုံးချုပ်အောင် ရှိနိုင်သော်လည်း သည်ကန္တာတောခြေတွေမှာ နွေဦးဥသြသံ မကြားခဲ့ရ။ ဥရောပကဗျာတွေမှာ ဥသြ (cuckoo)၊ ဥသြသံထွက်သည့် သံစုံနာရီ (cuckoo clock) ဆိုတာတွေ ကျွန်တော်ဖတ်ဖူးပါလျက် ဥသြသံကို အကြောင်းမဆိုက်၍ဘဲလားမသိ။ ကျွန်တော် မကြားခဲ့ရိုး အမှန်။

မနေ့တစ်နေ့ကမှ ရောက်ခဲ့ရသော မလေးရှားနိုင်ငံ၊ စင်္ကာပူနိုင်ငံတွေမှာတော့ ဥသြသံတွေ အီလောက်အောင် ကြားခဲ့ရသည်။ ဥသြသံမှ ဥသြတွန်သံအစစ်။ အထပ်မြင့်တိုက်ခန်းတွေမှာ နေခွင့်ရခဲ့သဖြင့် ကွာလာလမ်ပူတစ်မြို့လုံးကို ဆီးမြင်နေရသော ကျွန်တော့်မှာ သည်ဥသြသံ ဘယ်ကလာသလဲ မရှာတတ်အောင် ဖြစ်နေရသည်။ ကျွန်တော် မြင်ရသလောက် အထပ်အထပ် လမ်းမကြီးတွေ၊ မြင့်မားသော မိုးမျှော်တိုက်ကြီးတွေ၊ ကွန်ကရိ တံတားကြီးတွေသာ ရှိသည်။ ရှိနေသည့် သစ်ပင်တွေကလည်း ဥသြခိုလောက်စရာ မရှိ။ တောမြိုင်ခြေလမ်း မဟုတ်။

“ဥသြသံက သည်မှာ ဆယ့်နှစ်ရာသီကြားရတယ်။ ကျွန်တော်တို့လည်း ရောက်စက ဥသြသံကြားတော့ ဇာတိ လွမ်းရသေးတယ်။ မဟုတ်ဘူးဗျ၊ ဥသြက တစ်နှစ်လုံး တွန်နေတာ။ အီကွေတာရာသီဥတု ရှိလို့လားတော့ မပြော တတ်ဘူး”

မလေးရှားရောက် မြန်မာမိတ်ဆွေတွေက ပြောပြခြင်းဖြစ်သည်။ မလေးရှားတွင်နေရသည့် ရက်များအတွင်း ကွာလာလမ်ပူမြို့ကြီး၏ တောင်ပိုင်းမှာရော မြောက်ပိုင်းမှာပါ တည်းခိုခွင့် ရခဲ့ပါသည်။ ဥသြသံကိုတော့ နေရာတိုင်းမှာ ကြားခဲ့ရသည်။ ကေဒါ (ကဒါး) ပြည်နယ်၊ ဆလန်ဂေါပြည်နယ်တွေ ရောက်တော့လည်း ကြားခဲ့ရသည်။ တောစိုး သစ်ပင်ကြီးတွေပေါ်က တဖွဲ့တနွဲ့ လွမ်းယဲ့ယဲ့ကြားရတာမျိုးတော့ မဟုတ်။ ဖုတ်ပူမီးတိုက် တွန်းသံမျိုးဖြစ်သည်။ မလေးရှားသည် ပထ၀ီဝင်အရ ပင်လယ်လွှမ်းမိုးမှုရှိသော ရာသီဥတုရှိသည်။ အိန္ဒိယသမုဒ္ဒရာလေထုနှင့် တောင်တရုတ် ပင်လယ်လေထုက ရာသီဥတုနှစ်မျိုးကို ဖြစ်ပေါ်စေသည်။ ပျမ်းမျှ ၂၀ ဒီဂရီစင်တီဂရိတ်မှ ၃၂ ဒီဂရီ စင်တီဂရိတ်ကြားမှာ ရှိနေတတ်သည်။ ညှို့လာသောမိုးက ရွာချင်ရွာသလို လင်းလာသော နေက သာချင်သာသည်။ ပုံမှန်အားဖြင့် နွေးနွေးထွေးထွေး ရာသီဥတုမျိုးဟု ဆိုနိုင်သည်။

“အရှေ့မြောက်မုတ်သုံရာသီနဲ့ အနောက်တောင်မုတ်သုံရာသီရယ်လို့ နှစ်မျိုးရှိတယ်။ စိုထိုင်းစလည်း များတယ်။ ဒါပေမဲ့ အပူပိုင်း အီကွေတာ ရာသီဥတုရယ်လို့လည်း ရှိပြန်တယ်။ အရှေ့ဘက်ကမ်းရိုးတန်းနဲ့ အနောက်ဘက် ကမ်းရိုးတန်းတွေမှာ ခြွင်းချက်ရှိပေမဲ့ ပုံမှန်အားဖြင့် နွေဦးနဲ့ဆင်တယ်”

ဥသြတို့ မျက်စိလည်ကြပုံပေါ်သည်။ သည်တော့လည်း ကြားရဖန်များတော့ ကျွန်တော့်မှာ မချိုစကောင်း ချိုစကောင်း ဖြစ်ရသည်။ မလွမ်းစကောင်း လွမ်းစကောင်း ဖြစ်ရသည်။

စင်ကာပူမှာလည်း ဥသြသံကြားရသည်။ မြို့ပြခေတ်ဆန်မှုတွေကြားက ကြားရသော ဥသြသံကို ကျွန်တော် နားမလည်နိုင်ဘဲ ရှိခဲ့သည်။ ကျွန်တော် တည်းနေသည့်တိုက်ခန်းက ကြည့်လျှင် ကုန်သင်္ဘောကြီးတွေပေါ်ကို ကုန်သေတ္တာ ကြီးတွေ တင်ပေးနေသော စင်ကာပူဆိပ်ကမ်း လုပ်ငန်းခွင်ကြီးကို မြင်နေရသည်။ ခေတ်လွန် ဗိသုကာ အဆောက်အအုံ တွေကို မြင်နေရသည်။ သည်ကြားထဲက ဥသြတွန်သံ ကြားရခြင်းဖြစ်သည်။ လွမ်းစရာမကောင်းလိုက်ပုံများ။

သည်ရက်ထဲမှာပဲ အညာခေါင်ခေါင်နယ်မြို့ကလေးတွေဆီ ရောက်ခဲ့သည်။ ဘယ်ကိုကြည့်ကြည့် ကျောက်စရစ်ကုန်းနှင့် အင်တိုင်းတောခြောက်ကိုသာ မြင်နေရသည်။ တောခြောက်တွေထဲက တောပန်း တောင်ပန်းတွေ မြင်ရသည်။ လက်ပံပွင့် ၀တ်ရည်ချိုကို သောက်ကြရင်း မူးယစ်နေကြသော ဆက်ရက်တွေကို မြင်ရသည်။

“ကြောင်ရှာနှင့် နဘဲ၊ ရှင်ကစ္စဲနှင့် ရှင်ပါကူ၊ လဲလူ မ ဖို၊ ကုတ်ကိုနှင့် ကုတ်ဟီး၊ မန်ကျည်းနှင့် သနပ်၊ ဒဟပ်နှင့် သန်းထိမ်၊ ကျည်းဖြူနှင့် ပျဉ်းတော်သိမ်၊ လွန်လိမ်ဖလန်၊ သီးပေါင်မဲ့ ဆီးခံ၊ လက်ပံနှင့် လပ်ခုပ်၊ ကြက်မအုပ် ကြက်မောက်၊ တောရှောက်ခပေါင်း၊ ထနောင်းနှင့် ထောက်ရှာ၊ ယင်းမာနှင့် ရင်းတိုက်”

အင်တိုင်းတောကလေးတွေဆီက ဥသြသံကိုပါ ကြားရသည်။ သည်တစ်ခါတော့ အလွမ်းဓာတ်ပါသော သံအေးချိုချိုသည် ကျွန်တော့်ရင်ကို ပုတ်နှိုးလိုက်သည်။ မြန်မာ့နွေဦးနှင့် မြန်မာ့ဥသြ အတူနှောပါမှ လွမ်းရသည်ကော။


နေ၀င်းမြင့်

လွန်ခဲ့သည့်တစ်ပတ်က ဟောပြောပွဲတစ်ခုအပြီး မေးခွန်းများကို ကျွန်မဖိတ်ခေါ်သောအခါ စာရွက်ပိုင်းလေးတွေ ကျွန်မဆီသို့ အများအပြားရောက်လာခဲ့သည်။ ထိုစာရွက်များထဲတွင် မေးခွန်းတစ်ခုက ဆရာမအကြိုက်ဆုံး စာအုပ်သုံးအုပ်ကို ပြောပြပါတဲ့။ 

သူက အကြိုက်ဆုံးဟုသာဆိုပေမယ့် ကျွန်မကိုယ်တိုင်၏ စာအုပ်တွေထဲကလား၊ ကျွန်မဖတ်ခဲ့သော စာအုပ်တွေထဲကလား မကွဲပြားပေ။ ထို့ကြောင့် နှစ်မျိုးလုံးဖြေလိုက်ပါသည်။ 

ကျွန်မစာအုပ်တွေထဲမှာ အကြိုက်ဆုံးရယ်လို့ တန်းစီလိုက်လျှင် ပါနေကျထုံးစံတွေပေါ့။ သုံးအုပ်ဟု ကန့်သတ် လိုက် သည့်အခါ စက္ကန့်ပိုင်းအတွင်း ရေတွက်ကြည့်ဖို့က တော်တော်ခက်ခဲပါသည်။ အခြားစာရေးဆရာများ၏ စာအုပ် တွေကတော့ ကြိုက်နှစ်သက်သည်မှာ များလွန်းလှသဖြင့် သုံးအုပ်ထဲရွေးဖို့ ပို၍ပင် ခက်သေးတော့သည်။ သို့သော် ကျွန်မအာရုံထဲရောက်သမျှ ရေတွက်ပြလိုက်သည်။ ကျွန်မခဏခဏဖတ်နေကျထဲက သုံးအုပ်ထဲပါမသွားဘဲ ကျန်နေသည့်စာအုပ်ပေါင်း နှစ်ဆယ်လောက်ကိုတော့ စိတ်ထဲက တောင်းပန်လိုက်ရသည်။

ကျွန်မရေရွတ်ပြသည့် စာအုပ်သုံးအုပ်မှာ တစ်ခုက ကျွန်မကို အ၀ါရောင်ရထားဝတ္ထုတို ရေးဖြစ်အောင် အာရုံဝင်စားမှုပေးခဲ့သည့် လူမှုရေးဆိုင်ရာပရဟိတစိတ်ကို လှုံ့ဆော်ပေးသည့် စာတစ်ပုဒ်ပါဝင်သည့် အက်ဆေးပေါင်းချုပ် စာအုပ်တစ်အုပ်၊ နောက်တစ်ခုက ဆင်းရဲမွဲတေခြင်းကို တိုက်ဖျက်ဇာတ်သိမ်းစေမည်ဟူသော ဟားဘတ်တက္ကသိုလ်ထွက် အမေရိကန် စီးပွားရေးပညာရှင်တစ်ဦး၏ စာအုပ်တစ်အုပ်နှင့် အမေရိကန်ပညာရှင်တစ်ယောက်ရေးသော မြန်မာနိုင်ငံမြောက်ဖျားစွန်းက နောက်ဆုံးရွာ၏အလွန်ဟူသော စာအုပ်တစ်အုပ်ဖြစ်ခဲ့သည်။ ထိုစာအုပ်သုံးအုပ်ကို ကျွန်မဘာကြောင့် ခဏခဏ ပြန်ဖတ်ဖြစ်သလဲဆိုသည်ကိုလည်း သူတို့အား ရှင်းပြခဲ့သည်။ 

ထိုစာအုပ်သုံးအုပ်လုံးသည် ကျွန်မအတွက် မျှော်လင့်ချက်တွေကိုပေးသည်။ ဆုံးဖြတ်ချက်တွေကိုပေးသည်။ စိတ်ဓာတ် ပျက်ပြားနေသော ကျွန်မကိုဆက်ရှင်သန်နိုင်ဖို့ ခွန်အားတွေပေးခဲ့သည်။ ဘာသာရပ်သုံးခုအတွက် မျှော်လင့်ခြင်း ခွန်အားသုံးမျိုး ဆိုပါစို့။ 

ပြောပြီးနောက် ကျွန်မချက်ခြင်းသတိရသွားသဖြင့် ရယ်မောလျက်ထပ်ပြောလိုက်မိသည်။ “ရသစာပေကို ဖတ်ဖို့ရော ဖန်တီးဖို့ရော အလွန်မြတ်နိုးတဲ့ကျွန်မ အခုရွေးလိုက်တဲ့ စာအုပ်သုံးအုပ်မှာ နှစ်အုပ်က ရသမဟုတ်တဲ့ စာတွေဖြစ်နေတာ အံ့သြစရာလဲကောင်း၊ ရယ်စရာလဲ ကောင်းပါတယ်”

ကျွန်မ ဘာကြောင့်ဝတ္ထုကဗျာတွေကို မရွေးလိုက်မိသလဲ။ တကယ်ဆို ကျွန်မ မနက်မနက်မှာ အိပ်ရာမှမထခင် ဖတ်ဖို့ချထားသည့် စာအုပ်တွေ လေးငါးအုပ်တွင် အခုထိဖတ်မပြီးသေးသည့် တရုတ်အမေရိကန်စာရေးဆရာမ အေမီတန်၏ Saving Fish from Drowning ၀တ္ထုပါသည်။ ပြင်သစ်သို့ ပြောင်းရွှေ့သွားသည့် တရုတ်စာရေးဆရာ၏ ပြင်သစ်လိုရေးသားထုတ်ဝေခဲ့သည့် အင်္ဂလိပ်ဘာသာပြန် ဘောလ်ဇက်နှင့်အပ်ချုပ်သည်မလေးဟူသော ၀တ္ထုစာအုပ် ကျွန်မဖတ်ပြီးသွားသော်လည်း အနီးအနားမှာ ရှိနေသေးသည်။ ထိုစာအုပ်တွေကို ကျွန်မကြိုက်ပါသည်။ ဘာကြောင့် ကျွန်မ ထိုစာအုပ်တွေကို ထည့်မရေတွက်မိပါလိမ့်။

ဟောပြောပွဲအပြီး ညမှာ ကျွန်မကိုယ့်ကိုယ်ကို ဆင်ခြင်မိတော့ ကျွန်မသည် ရသစာပေကို မျှဝေမိသည်ထက် ရသမဟုတ်သော စာပေကို မျှဝေမိနေသည်က များနေပါလား။

တစ်နေ့တစ်နေ့ ကျွန်မဖတ်သောစာတွေကို ခွဲခြားကြည့်လျှင် ရသစာပေထက် ရသမဟုတ်သောစာတွေက ရာခိုင်နှုန်းပိုများနေသည်ကို တွေ့ရသည်။ ဖတ်ရှုနှုန်းနှစ်ခု၏ ကွာခြားချက်က သိပ်တော့မများလှသေးပါ။ ကျွန်မစာအုပ်စင်တွင်ထားပြီး ခဏခဏထုတ်ဖတ်သော စာအုပ်များတွင် ကဗျာစာအုပ်တွေက သုံးလေးအုပ်ပါနေသည်ကို သတိထားမိသည်။ ၀တ္ထုတိုတွေလည်း လေးငါးအုပ်ပါ။ သို့သော် အိပ်ရာဘေးမှာ စီကာစဉ်ကာ ပတ်လည်ဝိုင်း နေသည့်အများစုက ရသမဟုတ်သော စာများနှင့် ဖတ်ရလွယ်ကူသော သတင်းအပြည့်ပေးသော အပတ်စဉ်ထုတ် ဂျာနယ်များဖြစ်နေသည်။

လွန်ခဲ့သည့် သုံးလေးလအတွင်း ဖတ်ပြီးသွားခဲ့သည့် စာအုပ်တွေကို ပြန်စဉ်းစားကြည့်လိုက်သည်။

သဘာဝပတ်ဝန်းကျင်နှင့် အိပ်ခ်ျအိုင်ဗွီ/အိတ်ဒ်စ် စာအုပ်စာတမ်းတွေ။

တိုင်းမ်စ်မဂ္ဂင်းဇင်းကိုပဲကြည့်။ စိမ်းလန်းသောအိပ်မက်များတဲ့။ အာရှ၏လေထုရေထုညစ်ညမ်းမှုတွေ ယိုယွင်းမှုတွေထဲမှ ဖောက်ထွက်ကာ သန့်စင်အောင် ကြိုးစားဆောင်ရွက်လိုက်သော တောင်ကိုရီးယားနိုင်ငံ ဆိုးလ်မြို့တော်ဝန်၏ အောင်မြင်မှုတွေအကြောင်းဖတ်ရသည်။ ဆိုးလ်မြို့လယ်ခေါင်မှာ ညစ်ညမ်းနေခဲ့သော ချွန်ဂေးချုန်းချောင်းကို ပြန်သန့်စင် လိုက်ခြင်းဖြစ်သည်။

နောက်ပြီး ကမ္ဘာ့ဒုတိယအစိမ်းလန်းဆုံးနိုင်ငံဖြစ်သည့် ဆွီဒင်နိုင်ငံမှာ ဇီဝဓာတ်ငွေ့ဖြင့် မောင်းနှင်မည့် ရထားတွဲများ အကြောင်းပါဝင်သည်။ ၂၀၂၀ခုနှစ်တွင် ရေရှည်တည်တံ့မည့် ဖွံ့ဖြိုးတိုးတက်မှု အကောင်အထည် ဖော်နိုင်ရမည်ဟု ရေရှည်ဖွံ့ဖြိုးတိုးတက်မှုဝန်ကြီးဌာန၏ အမျိုးသမီးဝန်ကြီး မိုနာဆာလင်က စီမံကိန်းအကြောင်း ထုတ်ဖော်ပြောခဲ့သည်။

“အဲဒီအချိန်မှာ အိမ်တိုင်းမှာ အပူပေးစနစ်အတွက် လောင်စာဆီမလိုအပ်တော့ဘူး။ မော်တော်ကားတွေမှာလည်း ဓာတ်ဆီမလိုအပ်တော့ဘူး။ တစ်ခြားရွေးချယ်စရာတွေ ရှိလာတော့မယ်” ဟု သူမက ကြေငြာခဲ့သည်။ လုပ်နိုင်ပါ့မလား။ ဆွီဒင်နိုင်ငံက လုပ်နိုင်ပါလိမ့်မည်။ ၁၉၇၀ ခုနှစ်တုန်းက အရှေ့အလယ်ပိုင်း အကြပ်အတည်းမတိုင်မီ ဆွီဒင်သည် သူ့လောင်စာစွမ်းအင်အသုံး၏ ၇၇ ရာခိုင်နှုန်းကို ရေနံမှ ရခဲ့သည်။ ၂၀၀၃ခုနှစ်တွင် စက်မှုလုပ်ငန်းများ အလွန်တိုးတက် ထွန်းကားလာသော်လည်း ရေနံပေါ်မှီခိုမှုက ၃၄ ရာခိုင်နှုန်းထိ လျှော့ချနိုင်ခဲ့သည်။ ဆွီဒင်နိုင်ငံသည် သူ့သဘာဝ အရင်းအမြစ်များအပေါ် စီမံကွပ်ကဲမှု ကောင်းမွန်ခဲ့၏။

“ကျွန်မတို့မှာ ရေအားလျှပ်စစ်အတွက် နေရာတွေအများကြီးရှိတယ်။ ဇီဝစွမ်းအင် (Biomass) တွေရှိတယ်။ လေစွမ်းအင်အတွက် နေရာတွေအများကြီးရှိတယ်” ဟု ၀န်ကြီးက ပြောခဲ့သည်။

သဘာဝပတ်ဝန်းကျင်နှင့် ပတ်သက်သော သိပ္ပံနည်းပညာတွေက အားတက်စရာပါလား။ သူများနိုင်ငံတွေမှာ အကောင်အထည်ဖော်ဖို့ ကြိုးစားနေကြတာမြင်ရတော့ အားကျမိသည်။ သူတို့ခေါင်းဆောင်တွေကလည်း သူများ နိုင်ငံရေးခေါင်းဆောင်တွေ တွေးတောင်မတွေးမိသည့် ဥပဒေတွေကို ထုတ်ပြန်ဆောင်ရွက်ခဲ့သတဲ့။ လောင်စာနှင့် ကာဗွန်ဒိုင်အောက်ဆိုဒ်ထုတ်လွှတ်မှုများအတွက် အခွန်ကောက်ခြင်းဖြစ်သည်။ အိမ်တွေကားတွေမှာ ရေနံလောင်စာ အသုံးကို တစ်ခြားအသစ်ပြန်ဖြည့်စွမ်းအင်များနှင့် အစားထိုးရန် စဉ်းစားလာကြသည်။ တစ်ချို့တွေက အခွန်အတွက် ညည်းညူကြသည်။ သို့သော် အများစုသော ဆွီဒင်နိုင်ငံသူနိုင်ငံသားများသည် ကမ္ဘာကြီးကို ကယ်ဆယ်ပေးဖို့ တက်ကြွစွာ ကူညီလိုစိတ်ရှိကြသည်ဟုဆိုသည်။

ဘယ်လောက်များအားကျဖို့ကောင်းလိုက်ပါသလဲ။ ဆွီဒင်သည် အပင်စွန့်ပစ်ပစ္စည်းမှရသော ဇီဝဓာတ်ငွေ့နှင့် အီသနောတို့ဖြင့် ရေနံလောင်စာ ကို အစားထိုးနေပြီ။ တစ်နိုင်ငံလုံးတွင် အခြားလောင်စာစွမ်းအင်တို့ကို ဆိုင်တွင်ဖွင့်လျက် ရောင်းချအသုံးပြုနေကြသည်။ မော်တော်ယာဉ်တွေ၏ ၁၃ ရာခိုင်နှုန်းမှာ ဇီဝဓာတ်ငွေ့သုံးတီထွင်မှုအသစ်များဖြင့် ကားများဖြစ်ကြသည်။ နိုင်ငံ၏ဒေသဆိုင်ရာ အုပ်ချုပ်သူတွေကလည်း နိုင်ငံသားတို့ အတူပူးတွဲပါဝင်နိုင်မည့် ရည်မှန်းချက်တွေကို ချမှတ်အကောင်အထည်ဖော်ကြသည်တဲ့။ အိမ်တွေမှ စွန့်ပစ်သည့် အောဂဲနစ်အမှိုက်များ၊ စိုက်ပျိုးခင်းတို့မှ အော်ဂဲနစ်အမှိုက်များဖြင့်ထုတ်ယူသော ဇီဝဓာတ်ငွေ့ကိုသုံးကာ ကားတွေမောင်းနှင်ပြီးဖြစ်သည်။

ထိုသတင်းမျိုးတွေက ကျွန်မအနီးတွင် တ၀ဲလည်လည်ရှိနေကြသည်။ ရသစာပေတွေက ကောက်ကိုင်ပြီးလျှင် ခဏအတွင်းပြန်ချထားလို့မရ။ နောက်ပြီး ကျွန်မက ၀တ္ထုဖတ်လျှင် အချိန်ယူချင်သည်။ အေးအေးဆေးဆေးဖတ်ချင်သည်။ နောက်နေ့၊ နောက်တစ်ပတ်၊ နောက်လ စသည့် တာဝန်တွေ ချိန်းဆိုမှုတွေနှင့် ကျွန်မ၀တ္ထုဖတ်လို့ ရမည်မထင်။ သို့သော် အခုအချိန်မှာတော့ ၀တ္ထုကို လုံးချင်းတွေလည်း တစ်ချီတည်းဖတ်ဖို့ အချိန်မရပေမယ့် နံနက်ခင်းလေးတွေ ညအိပ်ရာဝင်ချိန်လေးတွေမှာ ဖတ်နေဆဲပါ။

အရင်တုန်းကလို ခရီးထွက်ပြီး အေးအေးဆေးဆေးစာဖတ်နိုင်သည့် ကာလတွေကို လွမ်းမိသည်။ သို့သော်တကယ်တော့ ကျွန်မတို့မှာ ကုန်ဈေးနှုန်းနှင့် စီမံထိန်းသိမ်းမှုအတွက် ပူပန်နေရုံသာမက အချိန်ကာလတွေလည်း ရှားပါးလာခဲ့ပြီ။

အရင်က မြို့အပြင်ခရီးသွားမှ လက်ဆွဲအိတ်ထဲ စာအုပ်တွေ ကောက်ထည့်ကာ ခရီးတစ်လျှောက်နှင့် တစ်ခြားမြို့၏ ဧည့်သည်ဘ၀ဖြင့် စာအုပ်တွေ ဖတ်ကောင်းလှသော ကျွန်မသည် ခုအခါ မြို့ထဲတစ်နေရာရာ အသွားမှာပင် စာအုပ်တစ်ခုခုကို အိတ်ထဲမှာ ထည့်ထားသည့် အကျင့်ကို ရခဲ့ပြီ။ တစ်ခုခုကို စောင့်နေသည့် ဆယ်မိနစ် ဆယ့်ငါးမိနစ်အချိန်မှာ စာအုပ်ကိုကောက်ကိုင်ပြီး ဖတ်နေလိုက်လျှင် လေးငါးမျက်နှာ ပြီးသွားလည်း မနည်းပါဘူးဟု စိတ်ကို လျှော့ချတတ်လာသည်။

ကျွန်မ သယ်သယ်လာတတ်သည့် စာအုပ်တွေကို ပြန်ဆန်းစစ်မိတော့ အေမီတန်ကို မသယ်ယူခဲ့။ ဂျပန်စာရေးဆရာ ကင်ဇာဘူရိုအိုအေး၏ တိတ်ဆိတ်သောငိုသံ မသယ်ယူခဲ့။ ခပ်ပါးပါးစာအုပ် ပြီးတော့ တစ်ခုဖတ်ပြီးချထားကာ နောက်တစ်နေရာမှာတွေ့သည့် စာမျက်နှာကောက်လှန်လို့ အဆင်ပြေသည့် စာအုပ်တွေကို သယ်မိသည်။ အဲဒါကတော့ Scientific American တို့၊ Time တို့၊ ပြည်တွင်းမှာထုတ်ဝေသော The Waves မဂ္ဂဇင်းတို့၊ ချင်းတွင်း မဂ္ဂဇင်းတို့ဖြစ်သည်။

လုံးချင်းဝတ္ထုတစ်ပုဒ်လောက် ပင်ပင်ပန်းပန်းရေးပြီးသွားတိုင်း ကျွန်မခဏခဏကြွေးကြော်လေ့ရှိပြီး အကောင်အထည် မဖော်နိုင်သော စကားတစ်ခွန်းရှိပါသည်။

“တော်ပြီ။ ငါ အခုအချိန်ကစပြီး တစ်လတိတိ စာဆိုလို့ ကကြီးတစ်လုံးတောင် မရေးတော့ဘူး။ နားထားမယ်”

စာမရေးဘဲ ဘယ်လိုနေလို့ရပါ့မလဲ။ အလွန်ဆုံး စာမရေးဘဲနေလို့ရလျှင် တစ်ပတ်ပေါ့။

အဲသည်လိုပဲ ရသ၀တ္ထုတွေ ဖတ်ချင်လွန်းလို့ ဟိုစာအုပ်ဝယ်လာ သည်စာအုပ်ဝယ်လာနှင့် ကြွေးကြော်မိတာ ခဏခဏ။

“တစ်ခါလောက်တော့ ဘာတာဝန်မှမပါဘဲ စိတ်အပန်းဖြေခရီးလေး တစ်ပတ်လောက်ထွက်ပြီး ဘာမှမလုပ်ဘဲ အိပ်လိုက်စားလိုက်နဲ့ စာတွေချည်း တစ်အုပ်ပြီးတစ်အုပ် ဖတ်နေလိုက်ဦးမယ်”

အဲသည်လို ရေရွတ်မိတာလည်း အကြိမ်မနည်းလှတော့ပါ။ အခုချိန်ထိတော့ ဝေးနေဆဲသာဖြစ်သည်။


ဂျူး


(၂၀၀၆ခုနှစ်၊ အောက်တိုဘာလ ၂၆နှစ်ပြည့် သိပ္ပံမဂ္ဂဇင်းအထူးထုတ်မှာပါတဲ့ (ကိုယ်ကိုယ်တိုင် ဆရာမဆီက သွားတောင်းခဲ့တဲ့) ဆောင်းပါးလေးပါ။ ကိုယ့်ဆီမှာ မဂ္ဂဇင်းရှိနေလို့ ပြန်ရိုက်ပြီး တင်ပေးလိုက်ပါတယ်။


ချစ်ခင်လေးစားလျက်
ဇွန်မိုးစက်